Óskemende bloger ultaralyq arazdyq qozdyrdy degen kúdіkpen ustaldy
Tіkeleı efırdegі agressıvtі sózder qala turǵynynyń shaǵymynan keıіn tekserіle bastady.
SMARTNEWS.KZ basylymynyń habarlaýynsha, Óskemende áleýmettіk jelіde arandatýshylyq sıpattaǵy málіmdemeler jasaǵan er adam qolǵa tústі. Polıtsııanyń málіmetіnshe, ol TikTok-taǵy tіkeleı efırlerde ultaralyq óshpendіlіk týdyrýy múmkіn sózder aıtqan.
Oqıǵa qala turǵynynyń shaǵymynan keıіn qozǵalǵan. Áıel quqyq qorǵaý organdarynan efır barysynda ulttyq belgіler boıynsha qorlaıtyn, beıádep sózder qoldanǵan qoldanýshyǵa shara qoldanýdy suraǵan.
Tekserý barysynda 35 jastaǵy azamattyń bіrneshe akkaýnt arqyly tіkeleı efır júrgіzgenі anyqtalǵan. Keıіn olardyń bіrі óshіrіlgen. Efırler «batl» formatynda ótіp, basqa qoldanýshylarmen pіkіrtalas kezіnde er adam, boljam boıynsha, mas kúıde bolǵan. Sol sátterde ol túrlі etnos ókіlderіne qatysty aýyr jáne qorlaıtyn sózder aıtqan.
Jınalǵan beınematerıaldarǵa psıhologııalyq-lıngvıstıkalyq saraptama júrgіzіlіp, onda ultaralyq arazdyq qozdyrý belgіlerі bar ekenі rastalǵan.
Qazіrgі ýaqytta kúdіktі ýaqytsha ustaý ızolıatoryna qamaldy. Atalǵan faktі boıynsha sotqa deıіngі tergeý amaldary jalǵasyp jatyr.
Material avtory
