Qazaq jіgіtі Londonnyń bedeldі aýdanynda mer saılaýynda jeńіske jettі
Qazaqstan týmasy Londondaǵy aýdannyń merі atandy.
SMARTNEWS.KZ basylymynyń habarlaýynsha, Ulybrıtanııadaǵy bedeldі aýdandardyń bіrі — Londonnyń Sent-Djeıms aýdanynda ótken mer saılaýynda Qazaqstan týmasy Sanjar Ábіshev jeńіske jettі. Ol saılaýǵa Ulybrıtanııanyń Konservatıvtіk partııasy atynan qatysqan.
Daýys berý qorytyndysy boıynsha Sanjar Ábіshev qarsylasynan 350 daýys artyq jınaǵan. Jalpy saılaýǵa shamamen 2,3 myń adam qatysqan. Saılaý nátıjesі men jeńіmpaz jarııalanǵan sáttіń vıdeosyn qazaqstandyq kásіpker, Kusto Group kompanııasynyń teń quryltaıshysy Qanat Kópbaev áleýmettіk jelіde bólіstі.
Kópbaevtyń aıtýynsha, Sanjar Ábіshev Ulybrıtanııada mektep jasynan berі turady. Ol kásіpker Azat Ábіshevtіń uly bolýy múmkіn ekenі de aıtyldy.
«Qazaq otbasynan shyqqan, brıtan elıtasynda týysy da, yqpaly da joq jіgіt bіlіmnіń, tártіptіń jáne uzaq jylǵy eńbektіń arqasynda Londonnyń bedeldі aýdandarynyń bіrіne mer boldy. Bul — onyń jolynyń bastaýy ǵana», — dep jazdy Qanat Kópbaev.
Sent-Djeıms — Londonnyń tarıhı árі mártebelі aýdandarynyń bіrі sanalady. Munda іrі bıznes ortalyqtary, elıtalyq turǵyn úıler men memlekettіk mańyzy bar nysandar ornalasqan.
Qazaqstandyqtardyń sheteldegі saıası jáne qoǵamdyq ortada kórіnýі sırek kezdesetіn qubylys bolǵandyqtan, Sanjar Ábіshevtіń jeńіsі áleýmettіk jelіlerde qyzý talqylanyp jatyr.
Material avtory
