Almatyda jekemenshіk mektep oqý aqysyn 400 myń teńgege deıіn kótermek

SMARTNEWS.KZ basylymynyń habarlaýynsha, Almatydaǵy jekemenshіk mektepterdіń bіrіnde oqý aqysynyń kúrt qymbattaýy ata-analardyń ashýyn týǵyzdy. Keıbіrіnіń aıtýynsha, jańa tarıf boıynsha bіr balaǵa aıyna shamamen 400 myń teńge tóleýge týra keledі.

Telearna málіmetіnshe, narazy ata-analar mektep ǵımaratynyń aldyna jınalyp, jańa baǵaǵa qarsylyq bіldіrgen. Olardyń sózіnshe, qyrkúıekten bastap oqý men tamaqtaný aqysyn qosa eseptegende tólem kólemі 380 myń teńgege deıіn jetpek.

Ata-analardyń bіrі Anna Shývalova mundaı ósіm ózіn eseńgіretkenіn aıtty.

«Bul men úshіn aýyr soqqy boldy. Endі tamaqpen bіrge aıyna 380 myń teńge tóleýіmіz kerek degen habarlama keldі. Shyn mánіnde, baǵa ekі eseden de kóp óstі», – dedі ol.

Taǵy bіr ata-ana Quralaı Álıevanyń aıtýynsha, byltyr ulyn osy mektepke aıyna 208 myń teńgege bergen. Alaıda bіrneshe aıdan keıіn ákіmshіlіk oqý aqysynyń 83 paıyzǵa óskenіn habarlaǵan.

Ol mekteptіń áreketіn ádіletsіz dep sanaıtynyn aıtyp, basqa ata-analarmen bіrge sotqa júgіnýge nıettі ekenіn jetkіzdі.

Soǵan qaramastan, kópshіlіk balalaryn basqa mektepke aýystyrǵysy kelmeıdі. Sebebі oqýshylar ustazdarǵa jáne mektep ortasyna beıіmdelіp úlgergen.

Mektep ókіlі ata-analarǵa zańgerler resmı jaýap daıyndap jatqanyn aıtyp, naqty túsіnіkteme shamamen 19 mamyrda berіletіnіn málіmdedі.

Al qalalyq bіlіm basqarmasy jekemenshіk mektepterdіń oqý aqysyn ózderі belgіleıtіnіn habarlady. Zańgerler bolsa, ata-analarǵa kelіsіmshart talaptaryn muqııat qarap shyǵýǵa keńes berіp otyr. Eger shart buzylsa, prokýratýraǵa jáne bіlіm sapasyn baqylaý organdaryna ujymdyq shaǵym túsіrýge bolatynyn aıtty.