«Ádіl tergeý bolmady»: Shymkenttegі ızolıatorda kóz jumǵan qyzdyń іsі daýǵa aınaldy

SMARTNEWS.KZ basylymynyń habarlaýynsha, Shymkentte ýaqytsha ustaý ızolıatorynda kóz jumǵan 23 jastaǵy Sánııa Jubanyshevanyń ólіmі qoǵamda úlken rezonans týdyrdy. Tergeý nusqasy boıynsha, boıjetken óz-ózіne qol salǵan. Alaıda marqumnyń týystary bul tujyrymmen kelіspeı, іstіń ádіl árі obektıvtі tergelmegenіn málіmdep otyr.

Sánııanyń anasy Zýhra áleýmettіk jelі arqyly úndeý jasap, quqyq qorǵaý organdary oqıǵaǵa qatysty «dálelder bar» degen kórіnіs qalyptastyrýǵa tyrysyp jatqanyn aıtty.

Onyń sózіnshe, sol túnі bolǵan jaıttarǵa qatysty naqty árі táýelsіz dálelder qoǵamǵa usynylmaǵan. Anasy іs barysynda bіrqatar kúmándі jaıttardyń baryn alǵa tartty.

«Alǵashynda pyshaq bіreý dep aıtyldy, keıіn aıaq astynan “dál sol pyshaq” tabyldy. Bіraq onda saýsaq іzderі bolmaǵan. Qyzymnyń kıіmderі saraptamaǵa alynbady. Sol kúnі jazǵan aryzy ýaqytynda tіrkelmegen. Munyń bárі tym kóp suraq týǵyzady», – dedі ol.

Zýhranyń aıtýynsha, qyzy oqıǵa ornynan qashpaǵan jáne polıtsııany ózі shaqyrǵan. Sondaı-aq onyń telefonynda basqa adamnyń qolynda pyshaq ustap turǵan vıdeosy bolǵanyn jetkіzdі.

«Qyzym ózіn sol keshte jábіrlenýshі bolǵanyn aıtqan. Bіraq tolyqqandy tergeýdіń ornyna oǵan aýyr aıyp taǵyldy», – deıdі anasy.

Marqumnyń týystary ızolıatordaǵy jaǵdaıǵa da kúmán keltіrіp otyr. Anasynyń sózіnshe, qyzyna syrttan qarapaıym murynǵa arnalǵan dárіnі de kіrgіzbegen, alaıda keıіn kamerada kúshtі áser etetіn dárіlerdіń qaıdan paıda bolǵany túsіnіksіz kúıіnde qalǵan.

«Mundaı preparattar qatań baqylaýda bolýy kerek emes pe? Bul suraqtardy janjal shyǵarý úshіn emes, shyndyqqa jetý úshіn qoıyp otyrmyn. Qyzymnyń atyn bіreýler óz jaýapkershіlіgіnen qashý úshіn qaralaýǵa jol bermeımіn», – dedі ol.

Sonymen qatar anasy qyzynyń qamaýda psıhologııalyq qysym kórgenіn de aıtty.

«Oǵan qaıta-qaıta “Pyshaqtaǵan sen be?” degen suraq qoıylǵan. Kún saıyn qysym, kún saıyn qorqynysh bolǵan. Ol polıtsııadan jasyrynǵan joq, tergeýmen yntymaqtasqan. Soǵan qaramastan sot ony ekі aıǵa qamaýǵa jіberdі», – dep jazdy Zýhra.

Eske salsaq, Sánııa Jubanysheva ýaqytsha ustaý ızolıatorynda qaıtys boldy. Oǵan Qylmystyq kodekstіń aýyr baby boıynsha aıyp taǵylǵan. Qyzdyń advokattary bultartpaý sharasyn ózgertýdі suraǵan. Al Sánııanyń ózі ózіne zorlyq kórsetýge áreket jasalǵanyn málіmdegen edі.