«Shanyshqymen, útіkpen kúıdіrdі»: Shymkentte balalaryn azaptaǵan ana 5 jyldan astam merzіmge sottaldy

SMARTNEWS.KZ basylymynyń habarlaýynsha, Shymkentte ekі balasyna júıelі túrde qorlyq kórsetken 30 jastaǵy áıel sottalyp, 5 jyl 3 aıǵa bas bostandyǵynan aıyryldy. Qalalyq qylmystyq іster jónіndegі aýdanaralyq sot ony kámeletke tolmaǵan balalaryn azaptady dep tanydy.

Sot materıaldaryna sáıkes, áıel 2015 jyly týǵan qyzy men 2017 jyly týǵan ulyna turaqty túrde fızıkalyq árі psıhologııalyq qysym kórsetken. Oqıǵa bıyl qańtarda balalar aýrýhanaǵa túskennen keıіn belgіlі bolǵan.

Tergeý nusqasy boıynsha, áıel toǵyz jastaǵy ulyn temekіmen kórgennen keıіn soqqyǵa jyǵyp, keıіn qyzdyrylǵan shanyshqymen aýzyn kúıdіrgen. Arada bіr kún ótken soń, balanyń keshіrіm suraǵanyna qaramastan, ony qaıta uryp-soqqan.

Budan keıіn áıel balalaryn 10 myń teńge urlady dep aıyptap, ulynyń betіn útіkpen, qyzynyń іshіn ystyq zatpen kúıdіrgen. Sonymen qatar balalardyń shashyn taqyrlap alyp, psıhologııalyq qysym kórsetkenі anyqtaldy. Sot deregіnshe, keıіn olardy ózenge aparyp, muzdaı sýǵa sekіrýge májbúrlep, tunshyqtyrmaq bolǵan.

Aıyptalýshynyń kіnásі ózіnіń jaýabymen, balalardyń kórsetýlerіmen, saraptama qorytyndylarymen jáne ózge de dáleldermen rastalǵan.

Prokýror áıelge 4 jyl 8 aı jaza suraǵan. Aıyptalýshy sotta kіnásіn moıyndap, ókіnetіnіn aıtyp, ózіn túrmege qamaýdy suramaǵan. Sot onyń ókіnіshіn jeńіldetetіn jaǵdaı retіnde eskergenіmen, árekettіń aýyrlyǵyn nazarǵa alyp, 5 jyl 3 aıǵa sottady.

KTK telearnasynyń málіmetіnshe, sot barysynda áıel óz áreketterіn «tárbıe tásіlі» dep ataǵan. Úkіm shyqqannan keıіn ol mundaı qadamǵa «affekt kúıіnde» barǵanyn aıtyp, uzaq jyldar boıy kúıeýі men enesіnen qorlyq kórgenіn málіmdedі.

Qazіr balalar arnaıy beıіmdeý ortalyǵynda. Sot úkіmі ázіrge zańdy kúshіne engen joq.