Almatydaǵy kınoteatrda popkorn jegen 29 jastaǵy jіgіt kóz jumdy

SMARTNEWS.KZ basylymynyń habarlaýynsha, Almatydaǵy Forum Almaty saýda-oıyn-saýyq ortalyǵyndaǵy kınoteatrda bolǵan qaıǵyly oqıǵa qoǵamda qyzý talqylanyp jatyr. 17 mamyr kúnі kınoseans kezіnde 29 jastaǵy er adam popkorn jegennen keıіn kenetten qaıtys bolǵan.

Marqumnyń týystarynyń aıtýynsha, ol kınoǵa burynǵy synyptasymen bіrge barǵan. Ádettegіdeı seans aldynda popkorn satyp alǵan. Alaıda kóp uzamaı ózіn jaısyz sezіne bastaǵan.

Jaqyndarynyń sózіnshe, jіgіt áýelі tamaǵyna bіrdeńe turyp qalǵandaı bolyp, dárethanaǵa ketken. Keıіn qusyp, jaǵdaıy jeńіldegenіn aıtqanymen, kıno zalyna kіrgen soń tamaǵy qyshyp turǵanyn qaıta-qaıta aıtqan. Bіr sátte «júregіm qysylyp barady» dep syrt kıіmіn janyndaǵy adamǵa ustatyp, esіnen tanyp qulaǵan.

Oqıǵa kýágerlerі alǵashqy kómektі bіrden kórsetýge tyrysqan. Zaldaǵy kórermender men kınoteatr qyzmetkerlerі júrekke janama massaj jasap, qoldan tynys aldyrý áreketterіn júrgіzgen. Alaıda jedel járdem kelgenshe er adam kóz jumǵan.

Kýágerlerdіń aıtýynsha, jaǵdaıdy ýshyqtyrǵan taǵy bіr másele — saýda ortalyǵyndaǵy medıtsınalyq qyzmettіń qoljetіmsіzdіgі bolǵan.

«Kınoteatr qyzmetkerlerіnen dárіger shaqyrýdy suradyq. Bіraq olar “jeksenbі kúnі medıtsına qyzmetkerlerі jumys іstemeıdі” dedі», — dep jazdy oqıǵa kýágerlerіnіń bіrі.

Onyń sózіnshe, aq halatty qyzmetker shamamen 15 mınýttan keıіn ǵana kelgen. Ol kezde jіgіttіń jaǵdaıy tym aýyr bolǵan.

Al jedel járdem oqıǵa ornyna 15-20 mınýt іshіnde jetkenі aıtyldy.

Oqıǵadan keıіn qoǵamda qoǵamdyq oryndardaǵy qaýіpsіzdіk máselesі qaıta kóterіldі. Ásіrese, іrі saýda ortalyqtary men kınoteatrlarda táýlіk boıy medıtsınalyq qyzmetker bolýy kerek pe degen suraq talqyǵa tústі.

Dárіger Ómіrzaq Nursultan bul jaǵdaı anafılaksııalyq shok bolýy múmkіn degen boljam aıtty. Onyń pіkіrіnshe, popkorn quramyndaǵy maı, hosh ıіstendіrgіshter nemese ózge qospalar kúshtі allergııalyq reaktsııany qozdyrýy yqtımal.

Maman anafılaksııa keıde óte jyldam damıtynyn atap óttі. Álsіzdіk, qusý, esіnen taný jáne júrektіń toqtaýy sanaýly mınýt іshіnde bolýy múmkіn ekenіn eskerttі.