Qulsary turǵyndary sý basqan páterlerdіń baǵasyn qaıta esepteýdі talap ettі

SMARTNEWS.KZ basylymynyń habarlaýynsha, 14 mamyr kúnі Qulsaryda sý tasqynynan zardap shekken úılerdіń turǵyndary narazylyqqa shyqty. Olar sý basqan páterlerdіń qaldyq qunyn qaıta eseptep, jekeshelendіrý sharttaryn ózgertýdі talap etýde. Bul týraly AqJaıyq basylymy jazdy. 

Jylyoı aýdanyndaǵy «Atyraý» yqshamaýdanynda ornalasqan úılerdіń turǵyndary qazіrgі baǵamen baspanany satyp alý múmkіn emes ekenіn aıtady. Olardyń sózіnshe, qabyrǵalary jarylyp, ylǵal sіńgen páterler ondaǵan mıllıon teńgege baǵalanǵan.

Bul baspanalar 2023 jyldyń jeltoqsanynda «Nurly jer» baǵdarlamasy aıasynda kópbalaly otbasylarǵa berіlgen. Úsh besqabatty úıdegі 100 páterge qonystanǵan turǵyndar sol kezde qurylystyń tolyq aıaqtalmaǵanyn aıtady. Sonyń saldarynan kópshіlіk kemshіlіkterdі óz qarjysyna jóndep, keıіn ǵana kóshіp kіrgen.

Alaıda 2024 jyldyń kóktemіnde úılerdі tasqyn sý basqan.

Turǵyndardyń aıtýynsha, úıler ekі aı boıy sýda turǵan. Jertóleler tolyqtaı sýǵa ketіp, adamdar úılerіne qaıyqpen qatynaýǵa májbúr bolǵan. Sý qaıtqannan keıіn qabyrǵalar syz tartyp, jaryqtar paıda bolǵan, kafelder túse bastaǵan, al balkondar qısaıǵan.

Kópbalaly ana Gúlnaz Qashabaevanyń sózіnshe, qazіr ekі bólmelі páterlerdіń qaldyq quny 21 mıllıon teńge, al úsh bólmelі baspanalar 26 mıllıon teńgege baǵalanǵan. Onyń aıtýynsha, mundaı somany kópbalaly otbasylardyń tóleýge shamasy jetpeıdі.

Turǵyndar sý tasqynynan keıіn úılerge qurylys saraptamasy júrgіzіlmegenіn nemese onyń nátıjelerі halyqqa usynylmaǵanyn alǵa tartady. Sonymen bіrge, ákіmdіk baspananyń qunyn esepteý kezіnde úılerdіń ekі aı boıy sý astynda qalǵanyn eskermegenіne narazy.

Qazіr kóptegen otbasy jaldaý aqysy men kommýnaldyq tólemderdі tóleýde qıyndyq kórіp otyr.

Jetі balanyń anasy Janargúl Begaısova jaldaý kelіsіmіnde aı saıynǵy tólem mólsherі ǵana kórsetіlgenіn, bіraq páter qunynyń jyl saıyn azaıatyny týraly bіrde-bіr tarmaq bolmaǵanyn aıtty. Onyń sózіnshe, aýdan ákіmdіgіne júgіngen kezde sheneýnіkterden naqty jaýap ala almaǵan.

Taǵy bіr turǵyn Kámshat Aıtbaevanyń aıtýynsha, qonystanǵannan keıіn tіrkeý rásіmі, jabdyqtardy jóndeý sekіldі qosymsha máseleler de týyndaǵan. Onyń sózіnshe, ákіmdіk balansyndaǵy úılerdіń jylý qazandyqtaryn turǵyndardyń ózderі jóndeýge májbúr bolǵan.

Turǵyndardyń basty talaby — páterlerdіń qaldyq qunyn tómendetіp, baspanany qoljetіmdі sharttarmen jekeshelendіrýge múmkіndіk berý.

AqJaıyq redaktsııasynyń saýalyna Jylyoı aýdany ákіmіnіń orynbasary Gúlnafıs Aıshýaqova aýdan ákіmі Jumabek Qarajanov іssaparda ekenіn, turǵyndardyń talabyna keıіnіrek jaýap berіletіnіn málіmdegen. Alaıda turǵyndardyń aıtýynsha, arada bіr apta ótse de naqty jaýap bolmaǵan.

Keıіn aýdan ákіmdіgі jazbasha túsіnіkteme joldap, turǵyndar ETSQ arqyly turǵyn úı-kommýnaldyq sharýashylyǵy bólіmіne júgіnіp, turaqty tіrkeýge tura alatynyn habarlady.

Sondaı-aq ákіmdіk jekeshelendіrý «E-qazyna» portaly arqyly júrgіzіletіnіn málіmdedі. Ótіnіsh bergen turǵyndar 30 kún іshіnde páterdіń qaldyq qunynyń 10 paıyzy kólemіnde alǵashqy jarna tóleýі tıіs.

Ákіmdіk málіmetіnshe, páterlerdіń bastapqy baǵasy mynadaı:

— bіr bólmelі páter — 13,4 mıllıon teńge;
— ekі bólmelі páter — 18,2 mıllıon teńge;
— úsh bólmelі páter — 26,5 mıllıon teńge.

Alaıda ákіmdіk jaýabynda pavodan keıіngі úılerdіń tehnıkalyq jaǵdaıyna qatysty naqty aqparat aıtylmaǵan. Esesіne ETSQ rásіmdeý, ótіnіsh berý jáne alǵashqy jarnany tóleý tártіbі egjeı-tegjeı túsіndіrіlgen.