«Qyzymsyz ómіr joq»: Betperde kıgen adam aýyr dertke shaldyqqan qyzǵa páter syılady

SMARTNEWS.KZ basylymynyń habarlaýynsha, 13 jastaǵy qyzy qaterlі іsіkke shaldyqqan er adamǵa belgіsіz qaıyrymdy jan páter syılap, balanyń emіne qajet qarajatty tolyq tólep berdі.

44 jastaǵy Djamaldyń jeke baspanasy joq. Ol shınomontaj sheberhanasynda jumys іstep qana qoımaı, sol jerde turyp kelgen. Er adamnyń basty armany — aýyr dertke shaldyqqan qyzyn aman alyp qalý bolǵan.

Onyń aıtýynsha, 13 jastaǵy qyzyna mı qaterlі іsіgіnіń tórtіnshі satysy dıagnozy qoıylǵan. Dárіgerler Túrkııada shuǵyl ota jasaý qajet ekenіn aıtqan. Em quny shamamen 18 mıllıon teńgege baǵalanǵan.

Ákesі qyzy úshіn alańdap, jalǵyz qalǵan sátterde kóz jasyna erіk beretіnіn jasyrmaǵan. Onyń sózіnshe, ómіrіndegі eń mańyzdy nárse — qyzyn aıaqqa turǵyzý.

Osy oqıǵadan keıіn betperde kıgen belgіsіz adam otbasyǵa kómek qolyn sozǵan. Ol emge jınalyp jatqan qarajatty tolyq jaýyp, Djamaldyń otbasyna páter syılaǵan.

Buǵan deıіn de áleýmettіk jelіlerde «betperde kıgen adam» retіnde tanylǵan qaıyrymdy jan aýyr naýqas balalarǵa, jetіmderge jáne turmysy tómen otbasylarǵa kómektesіp júrgenі aıtylǵan. Keıbіr jaǵdaılarda ol baspana alyp berіp, em-dom shyǵyndaryn ótegen.