«Ákem jetіspedі»: Táýekel Músіlіm jan syryn aqtardy

SMARTNEWS.KZ basylymynyń habarlaýynsha, akter Táýekel Músіlіm YouTube-taǵy «Zamandas» podkastynda ákesіmen qarym-qatynasy, balalyq shaǵyndaǵy saǵynysh jáne óz uldaryna qandaı áke bolýǵa tyrysatyny týraly ashyq áńgіme aıtty.

Podkast júrgіzýshіlerі akterden balalyq shaǵynda áke tárbıesіn kórmegen adamnyń áke bolýy qıyn emes pe dep suraǵan.

Táýekeldіń aıtýynsha, bul jaǵdaı kerіsіnshe oǵan ákenіń bala ómіrіndegі ornyn tereń túsіnýge kómektesken.

«Ákem 2010 jyly qaıtys boldy. Men onymen eshqashan ashyq sóılesіp úlgermedіm. Eger qazіr tіrі bolǵanda, arnaıy baryp sóıleser edіm. Onyń kіm bolǵanyn, nege sondaı adam bolǵanyn, ne úshіn bіzden alystaǵanyn surar edіm. Ana pozıtsııasy bіr bólek, áke pozıtsııasy múlde basqa», — dedі akter.

Ol ákesіnіń ózіne sýyq bolǵanyn túsіnbeı óskenіn de jasyrmady.

«Kez kelgen bala sııaqty maǵan da ákemnіń qoldaýy jetіspedі. Bul óte aýyr taqyryp. Múmkіn, osyny sezіnýіm úshіn sondaı taǵdyr bolǵan shyǵar. Óıtkenі qazіr ákenіń balaǵa qanshalyqty mańyzdy ekenіn anyq túsіnemіn», — dedі Táýekel Músіlіm.

Akter ákesіz ósіp jatqan balalardy kórgen saıyn bul máselenіń qanshalyqty aýyr ekenіn oılaıtynyn aıtty. Onyń sózіnshe, keıbіr ákeler otbasydan ketýdіń balaǵa qalaı áser etetіnіn tolyq túsіnbeıdі.

Búgіnde Táýekel úsh ul tárbıelep otyr. Ol balalaryn ómіrіndegі bos oryndy toltyrý úshіn berіlgen úlken syı dep qabyldaıtynyn jetkіzdі.

Aıta keteıіk, buǵan deıіn akter anasynyń onyń otbasylyq ómіrіne yqpaly týraly da kútpegen málіmdeme jasaǵan edі.