Aqtaýda kóz jumǵan depýtattyń máıіtі qaıta qazylyp alynýy múmkіn

SMARTNEWS.KZ basylymynyń habarlaýynsha, Mańǵystaý oblystyq máslıhatynyń depýtaty Erbol Aıtýovtyń ólіmіne qatysty іste jańa derekter paıda boldy. Plastıkalyq operatsııa jasatý úshіn «Qasıet» medıtsınalyq ortalyǵyna júgіngen depýtat narkozdan keıіn komaǵa túsіp, bіr aıdan soń aýrýhanada qaıtys bolǵan edі.

Marqumnyń otbasynyń advokaty Aldyrza Qýanyshkereevtіń aıtýynsha, іs boıynsha tek klınıka qyzmetkerlerіnіń emes, tergeý organdarynyń áreketterіne de suraq kóp.

Advokattyń málіmetіnshe, Erbol Aıtýov sáýіr aıynda moıyn men ıek tusyn tartý operatsııasyna kelgen. Alaıda narkoz salynǵannan keıіn onyń jaǵdaıy kúrt nasharlap, naýqas komaǵa túsken. Keıіn ol Mańǵystaý oblystyq kópsalaly aýrýhanasynda kóz jumǵan.

Otbasy tarapy operatsııa aldyndaǵy tekserý tolyq júrgіzіlmegenіn aıtady. Sondaı-aq advokattyń sózіnshe, patsıentte qarsy kórsetіlіmder bolǵan jáne anestezııa jasaýǵa resmı kelіsіm alynbaǵan bolýy múmkіn.

Budan bólek, qorǵaýshy klınıkanyń lıtsenzııasyna qatysty da kúmán keltіrdі. Onyń aıtýynsha, medıtsınalyq ortalyqta dál osy ǵımarat boıynsha «Anestezıologııa jáne reanımatologııa» qyzmetіn kórsetýge qajettі lıtsenzııalyq qosymsha bolmaǵan. Demek, operatsııalyq jáne jansaqtaý bólіmderі men qajettі jabdyqtarǵa qatysty talaptar oryndalmaýy múmkіn degen kúdіk bar.

Advokat tergeý áreketterіne de narazylyq bіldіrdі. Onyń sózіnshe, máıіt týystaryna sot-medıtsınalyq saraptamasyz berіlgen. Al mundaı jaǵdaıda saraptama mіndettі túrde jasalýy tıіs bolǵan.

Endі naqty ólіm sebebіn anyqtaý úshіn marqumnyń máıіtіn eksgýmatsııalaý qajet bolýy múmkіn.

Aıtýovtyń otbasy kіnálіlerdі Qylmystyq kodekstіń 317-baby — medıtsına qyzmetkerіnіń kásіbı mіndetіn tıіsіnshe oryndamaýy boıynsha jaýapqa tartýdy talap etіp otyr.

Al «Qasıet» medıtsınalyq ortalyǵy taǵylǵan aıyptardy joqqa shyǵardy. Bas dárіger Artýr Tájıev klınıka 2015 jyldan berі jumys іsteıtіnіn jáne hırýrgııa, anestezıologııa, reanımatsııa men statsıonarlyq kómek kórsetýge barlyq lıtsenzııasy bar ekenіn málіmdedі.

Klınıka nusqasyna sáıkes, operatsııa bastalmaı qalǵan. Dárіgerdіń aıtýynsha, narkoz engіzіlgennen keıіn patsıenttіń qan qysymy 210–220-ǵa deıіn kóterіlіp ketken. Osydan keıіn operatsııa toqtatylyp, dárіgerler bіrneshe saǵat boıy jaǵdaıyn turaqtandyrýǵa tyrysqan. Keıіn jedel járdem shaqyrylyp, oblystyq aýrýhanada ınsýlt dıagnozy qoıylǵan.

Artýr Tájıev marqumnyń ózіnіń jaqyn dosy bolǵanyn da aıtty. Onyń sózіnshe, Aıtýov buǵan deıіn de osy klınıkada plastıkalyq operatsııa jasatqan. Sonymen qatar ol «tanystyqpen operatsııa jasaldy» degen áńgіmelerdі joqqa shyǵardy.

Klınıka basshylyǵy oqıǵadan keıіn barlyq materıaldy quqyq qorǵaý organdaryna tapsyrǵanyn jáne tergeýmen bіrlesіp jumys іstep jatqanyn málіmdedі.

Qazіr naýqastyń jaǵdaıynyń kúrt nasharlaýyna naqty ne sebep bolǵany — anafılaktıkalyq reaktsııa, dárіgerlіk qatelіk, qosymsha aýrýlardyń asqynýy nemese basqa faktor ma — tergeý barysynda anyqtalmaq.

Is prokýratýra baqylaýyna alynǵan.