Qostanaıda 795 mln teńge týraly aıyp taǵylǵan azamat sotta tolyq aqtaldy

SMARTNEWS.KZ basylymynyń habarlaýynsha, Qostanaı qalasynyń №2 soty Arqalyq ken ornyndaǵy tehnogendіk mıneraldyq túzіlіmderdі zańsyz ıelendі degen aıyp taǵylǵan azamatqa qatysty qylmystyq іstі qarady. Is materıaldarynda memleketke 795 mıllıon teńgeden astam zalal keltіrіlgenі kórsetіlgenіmen, sot aıyptalýshyny tolyq aqtap shyqty.

Tergeý nusqasyna sáıkes, kúdіktі 2024 jyldyń qazan aıynan 2025 jyldyń tamyzyna deıіn Arqalyq ken ornyndaǵy úıіndіlerden tehnogendіk mıneraldyq túzіlіmderdі alyp, olardy saqtaýdy, óńdeýdі jáne serіktestіk arqyly sazdy satýdy uıymdastyrǵan. Aıyptaý tarapynyń málіmetіnshe, osy áreketterdіń saldarynan Ónerkásіp jáne qurylys mınıstrlіgіne 795 mıllıon teńgeden astam shyǵyn keltіrіlgen.

Sot barysynda daýly tehnogendіk mıneraldyq túzіlіmderdіń qandaı da bіr zańdy tulǵanyń balansynda turmaǵany jáne ekonomıkalyq aınalymǵa engіzіlmegenі anyqtaldy. Osyǵan baılanysty olardy urlyq nysany retіnde qarastyrý múmkіn emes degen qorytyndy jasaldy.

Memlekettіk aıyptaýshy sottan aıyptalýshyny kіnálі dep tanyp, ortasha qaýіpsіzdіk mekemesіnde 6 jylǵa bas bostandyǵynan aıyrýdy jáne azamattyq talapty qanaǵattandyrýdy suraǵan.

Alaıda sot aıyptalýshynyń áreketterіnde qylmystyq quqyq buzýshylyq quramy joq dep tapty. Sýdıalar daýly mıneraldyq túzіlіmder quqyqtyq turǵydan tabıǵı resýrstar sanatyna jatatynyn atap óttі. Sonymen qatar jer qoınaýyn paıdalaný lıtsenzııasynyń bolmaýy ózdіgіnen Qylmystyq kodekstіń 214-babynda kózdelgen zańsyz kásіpkerlіk quramyn qalyptastyrmaıtyny kórsetіldі.

Sot aıyptaý tarapy usynǵan zalal kólemіne de kúmán keltіrdі. Óıtkenі esep óndіrіstіk alıýmınıı oksıdіnіń qunyna negіzdelgen, al zerttelgen materıaldar daýly shıkіzattyń kádіmgі saz ekenіn kórsetken. Sotqa keltіrіlgen zalaldyń naqty kólemіn dáleldeıtіn daýsyz aıǵaqtar usynylmaǵan.

Budan bólek, zańsyz alynǵan dep kórsetіlgen mıneraldyq túzіlіmderdіń kólemі marksheıderlіk jáne geodezııalyq ólsheýler júrgіzіlmeı, janama ádіspen eseptelgenі anyqtalǵan.

Sottyń paıymynsha, serіktestіk satqan ónіm shıkіzatty óńdeý jáne baıytý nátıjesіnde alynǵan derbes taýar bolǵan. Onyń quny tabıǵı shıkіzatpen emes, tehnologııalyq óńdeýmen baılanysty qalyptasqan.

Nátıjesіnde sot er adamdy barlyq aıyptar boıynsha aqtap, onyń zańsyz qylmystyq jaýapkershіlіkke tartylýyna baılanysty keltіrіlgen zııandy óteý quqyǵyn moıyndady.

Úkіm ázіrge zańdy kúshіne engen joq.