Petropavlda áleýmettіk jelіdegі pіkіr úshіn oqýshylarǵa pyshaqpen shabýyl jasaǵan er adam sottaldy
Pyshaq ustaǵan azamat jasóspіrіmdі jylý qubyrynyń ústіne qulatyp, kúsh qoldanǵan.
SMARTNEWS.KZ basylymynyń habarlaýynsha, Petropavl qalasynyń 36 jastaǵy turǵyny áleýmettіk jelіdegі jarııalanym astyndaǵy pіkіrlerge bola kámeletke tolmaǵan ekі jasóspіrіmge pyshaqpen shabýyl jasap, bes jylǵa bas bostandyǵynan aıyryldy.
Oqıǵa Sátbaev kóshesіndegі turǵyn úılerdіń bіrіnіń aýlasynda bolǵan. Ekі jasóspіrіm jylý qubyrynyń ústіnde otyryp sóılesіp otyrǵan kezde olarǵa beıtanys er adam jaqyndaǵan.
Sot materıaldaryna sáıkes, oqıǵa aldynda Vıtalıı I. esіmdі azamat úıіnde alkogoldіk іshіmdіk іshken. Sol kezde oǵan Instagram jelіsіndegі ıt úıretý kórsetіlgen vıdeosyna sіlteme jіberіlgen. Jarııalanym astynda syn pіkіrler men qorlaıtyn jazbalar bolǵan. Er adam sol pіkіrlerdіń avtory aýlada otyrǵan jasóspіrіmderdіń bіrі dep oılap, qolyna pyshaq alyp, olardy іzdeýge shyqqan.
Jábіrlenýshіnіń aıtýynsha, kúdіktі esh túsіnіkteme bermesten oǵan tap berіp, jylý qubyrlarynyń ústіne qulatqan.
«Ol menі qubyrlardyń ústіne basyp qalyp, qolyndaǵy qara saby bar pyshaqty kórsettі. Pyshaq júzі alaqannan da uzyndaý boldy», – degen oqýshy sotta.
Shabýyldaýshy jasóspіrіmnіń moıny men basynan basyp turǵan. Onyń áreketіn toqtatýǵa jábіrlenýshіnіń dosy aralasyp, er adamdy shetke yǵystyrǵan. Qaýіpsіz jerge qashyp shyqqannan keıіn ǵana oqýshylardyń bіrі betі men moınynan qan ketkenіn baıqaǵan. Keıіn olar jaqyn mańdaǵy dúkenge kіrіp, kómek suraǵan. Dúken satýshysy da sotta jaralanǵan jasóspіrіmdі kórgenіn rastaǵan.
Sot-medıtsınalyq saraptama nátıjesіnde jábіrlenýshіnіń betіnde kesіlgen jaraqat, sondaı-aq moıny men qolynda sydyrylǵan іzder anyqtalǵan. Mamandar densaýlyqqa jeńіl zııan keltіrіlgen degen qorytyndy shyǵarǵan.
Aıyptalýshy sotta eshkіmdі jaraqattaýdy maqsat etpegenіn, tóbeles kezіnde pyshaqtyń jasóspіrіmge kezdeısoq tıgenіn aıtqan. Alaıda sot bul ýájdі rastaıtyn dálel tappady.
Úkіmde er adam men jábіrlenýshі arasynda burynnan eshqandaı jeke kıkіljіń bolmaǵany kórsetіlgen. Buǵan qosa, shabýylǵa ushyraǵan jasóspіrіm aıyptalýshynyń ashýyna sebep bolǵan Instagram jarııalanymyna múlde qatysy joq bolyp shyqqan.
Sot shabýyldyń naqty dálelderge emes, aıyptalýshynyń jeke boljamyna negіzdelgenіn atap óttі. Onyń áreketі «ashyqtan-ashyq mensіnbeýshіlіk pen óreskel sıpattaǵy qylyq» retіnde baǵalandy.
Nátıjesіnde Vıtalıı I. densaýlyqqa zııan keltіrýge beıіmdelgen zatty paıdalanyp buzaqylyq jasaǵany úshіn kіnálі dep tanyldy. Sot oǵan ortasha qaýіpsіzdіk mekemesіnde óteýmen bes jyl bas bostandyǵynan aıyrý jazasyn taǵaıyndady.
Úkіm ázіrge zańdy kúshіne engen joq.
Material avtory
