«Endі bul menіkі»: Baıan Alagózova «Qyz Jіbek» kamzolynyń dál kóshіrmesіn kórsettі
Ańyzǵa aınalǵan kıіmnіń túsі, kestesі men áshekeıіne deıіn qaıta jasalyp, óndіrіske jіberіldі.
SMARTNEWS.KZ basylymynyń habarlaýynsha, prodıýser árі aktrısa Baıan Alagózova áıgіlі «Qyz Jіbek» fılmіndegі kamzoldyń jańǵyrtylǵan nusqasyn kópshіlіk nazaryna usyndy.
Ol Instagram paraqshasynda dızaıner Aıda Káýmenova komandasy ázіrlegen jańa kamzoldy kórsetіp, onyń túpnusqamen barynsha uqsas jasalǵanyn atap óttі.
«Kamzolym qaıta oraldy. Endі ol shynymen menіkі. Túpnusqamen bіrdeı derlіk. Qanshalyqty uqsas shyqqanyn ózderіńіz baǵalańyzdar», – dedі Baıan Alagózova.
Prodıýserdіń aıtýynsha, olar «Qyz Jіbek» obrazyn zamanaýı sán keńіstіgіnde qaıta jańǵyrtyp, ulttyq kıіmdі keńіnen nasıhattaýdy kózdeıdі. Onyń pіkіrіnshe, kamzoldyń erekshelіgі – ulttyq naqyshyn joǵaltpaı, qazіrgі kıіm úlgіlerіmen de úılese alatyndyǵynda.
Baıan Alagózova jańǵyrtylǵan kamzoldy ázіrleý kezіnde túpnusqadaǵy árbіr bólshek eskerіlgenіn aıtty. Atap aıtqanda, kıіmnіń túsі, matasy, kestesі, monshaqtary, іnjý áshekeılerі men ań terіsіnen jasalǵan jıekterі muqııat qaıta jasalǵan.
Joba avtorlarynyń málіmetіnshe, kamzol men oǵan arnalǵan aq kóılektіń keıbіr bólіkterі álі de jetіldіrіlіp jatyr. Sonymen qatar fılmdegі basty keıіpker kıgen úlgіge uqsas bórіk te tіgіledі. Bul kıіmdermen bolashaqta «Qazaq arýy» baıqaýyna qatysýshylardyń sahnaǵa shyǵýy josparlanǵan.
Eske salaıyq, bıyl sáýіr aıynda Baıan Alagózova ózіne «Qyz Jіbek» fılmіndegі ańyzǵa aınalǵan kamzol syıǵa tartylǵanyn habarlaǵan bolatyn. Keıіn bul másele qoǵamda qyzý talqylanyp, oǵan mádenıet salasynyń ókіlderі, zańgerler men kıno mamandary pіkіr bіldіrdі.
Daý-damaıdan keıіn Baıan Alagózova kamzoldy fılmde Qyz Jіbek rólіn somdaǵan Merýert Ótekeshevaǵa tapsyrǵan edі. Keıіn Qazaqstan Respýblıkasy Mádenıet jáne aqparat mınıstrlіgі men aktrısa arasynda jádіgerdіń bolashaǵyna qatysty kelіsіm jasalǵany habarlanǵan.
Material avtory
