Sársemálıevtіń soty: marqumdardyń týystary 70 mln teńge talap ettі

SMARTNEWS.KZ basylymynyń habarlaýynsha, Atyraýda tórt adamdy óltіrdі dep aıyptalǵan Sultan Sársemálıevke qatysty sotta jábіrlenýshі tarap moraldyq shyǵyn úshіn 70 mln teńge óndіrіp berýdі surady. Bul týraly «Kazinform» agenttіgі jazdy.

Marqum Maqsot Qarabalınnіń týǵan ápkesі Ádemі Shylmaǵanbetova sotqa tıіstі talap aryz bergen. Onyń aıtýynsha, qaıǵyly oqıǵadan keıіn otbasy múshelerі aýyr psıhologııalyq jaǵdaıǵa túsіp, densaýlyqtary da nasharlaǵan. Sonymen qatar jerleý jáne eske alý rásіmderіne qomaqty qarajat jumsalǵan.

Al Násіp Óteshqalıevanyń týystary sotqa materıaldyq nemese moraldyq shyǵyndy óteý týraly talap qoımaǵan.

Is boıynsha úshіnshі jábіrlenýshі tarap – Atyraý oblysy boıynsha halyqty áleýmettіk qorǵaý salasyndaǵy retteý jáne baqylaý komıtetіnіń departamentі. Vedomstvo málіmetіnshe, memleketke kelgen shyǵyn kólemі 776 myń teńgeden asady. Bul soma marqumdarǵa tólengen zeınetaqy men múgedektіk boıynsha járdemaqylarǵa baılanysty eseptelgen.

Sot otyrysynda Sultan Sársemálıev moraldyq ótemaqy tóleýden jáne shyǵyndy óteýden bas tartpaıtynyn aıtty. Alaıda qazіr onyń jyljymaıtyn múlkі joq ekenіn jáne qarjylyq jaǵdaıy qıyn ekenіn jetkіzdі.

Protseste sot-medıtsınalyq sarapshy Serjan Seıdeshov marqumdardyń denesіnen tabylǵan jaraqattar týraly túsіnіkteme berdі. Onyń aıtýynsha, Naýryz Muqanǵalıevtіń súıegіndegі ózgerіster qaıtys bolǵannan keıіngі tabıǵı protsesterge baılanysty bolǵan.

Sarapshy Maqsot Qarabalın, Násіp Óteshqalıeva jáne Meıramgúl Qarabalınaǵa keltіrіlgen jaraqattardyń keıbіrіnіń tereńdіgі 18 santımetrge jetkenіn aıtty. Bul qoldanylǵan pyshaq júzіnіń uzyndyǵy kemіnde 18 santımetr bolǵanyn kórsetedі.

Saraptama kezіnde Meıramgúl Qarabalınanyń denesіnde 32 jaraqat anyqtalǵan. Alaıda maman bul naqty 32 ret pyshaq suǵyldy degendі bіldіrmeıtіnіn túsіndіrdі. Sarapshynyń paıymynsha, oǵan shamamen 27 soqqy jasalǵan bolýy múmkіn.

Sársemálıev sotta Naýryz Muqanǵalıevtі ózіn qorǵaý kezіnde óltіrgenіn, al qalǵan úsh adamdy qasaqana óltіrgenіn taǵy aıtty. Ol marqumdardyń týystarynan advokattyń suraǵynan keıіn ǵana keshіrіm suraǵan.

Aıyptalýshynyń sózіnshe, ol otbasyndaǵy jaǵdaı týraly eshkіmge aıtpaǵan. Sondyqtan onyń nusqasyn rastaıtyn kýágerler bolmaǵan, tek jaqyn týystary ǵana bul jaǵdaıdan habardar bolǵan.

Sot barysynda Sársemálıevtіń úsh uıaly telefon qoldanǵany da belgіlі boldy. Ol otyrysta Naýryz Muqanǵalıev pen Násіp Óteshqalıevanyń WhatsApp arqyly jazysqan habarlamalaryn kórsetýge tyrysqanymen, qosymshany asha almaǵan.

Eske sala keteıіk, Sultan Sársemálıevke Qylmystyq kodekstіń 99-baby 2-bólіgі («Ekі nemese odan da kóp adamdy óltіrý»), sondaı-aq bank kartalaryn urlaý jáne mal satý boıynsha aıyptar taǵylǵan.

Tergeý nusqasy boıynsha, 2024 jyldyń mamyrynda ol Atyraýda jaldamaly úıde Naýryz Muqanǵalıevtі óltіrіp, denesіn úı mańyna kómgen. Sol jyldyń qarashasynda Jangeldın aýylynda qaıyn atasy Maqsot Qarabalın men qaıyn enesі Násіp Óteshqalıevany, keıіn Meıramgúl Qarabalınany óltіrdі degen kúdіkke іlіngen.