Shymkent 17 jastaǵy qyzdy alyp qashqan úsh adam sottaldy

SMARTNEWS.KZ basylymynyń habarlaýynsha, Shymkentte kámeletke tolmaǵan kolledj stýdentіn erkіnen tys turmysqa bermek bolǵan adamdarǵa qatysty sot úkіmі shyqty. Úsh aıyptalýshy úsh jylǵa bas bostandyǵynan aıyryldy. Bul týraly Kazinform jazdy.

Oqıǵa 2025 jyldyń qarashasynda bolǵan. Is bıyl qańtarda 17 jastaǵy qyzdyń áleýmettіk jelі arqyly óz basynan ótken jaǵdaıdy aıtyp berýіnen keıіn qoǵam nazaryn aýdardy.

Jábіrlenýshіnіń aıtýynsha, tórt er adam ony Shymkenttegі Tashkent tasjoly mańynan kólіkke kúshtep otyrǵyzyp, telefonyn alyp qoıǵan. Keıіn Saryaǵash aýdanyndaǵy Derbіsek aýylyna aparǵan.

Qyzdyń sózіnshe, jіgіttіń týystary aldyn ala quda túsýge daıyndalyp, oǵan qysym kórsetken. Tіptі onyń óz erkіmen barǵany týraly qolhat jazdyrýǵa májbúrlegen. Sondaı-aq jábіrlenýshі ózіne kúsh qoldanylǵanyn aıtqan.

Keıіn qyz úıden qashyp shyǵyp, anasyna barǵan. Osydan keıіn polıtsııa Qylmystyq kodekstіń «Nekege turýǵa májbúrleý» babymen іs qozǵaǵan.

Sot anyqtaǵandaı, úsh sottalǵan jáne іzdeýde júrgen taǵy bіr adam aldyn ala sóz baılasyp, qyzdy kólіkke kúshtep otyrǵyzyp, Saryaǵash aýdanyndaǵy jeke úıge jetkіzgen. Sol jerde ony nekege turýǵa májbúrleýge áreket jasaǵan.

Aıyptalýshylardyń kіnásі saraptama qorytyndylary, zattaı dálelder jáne kýágerlerdіń jaýaptary arqyly dáleldengen.

Sýdıa Aına Oraqbaeva jábіrlenýshіnіń sol kúnі bіr jіgіtpen kezdesýge óz erkіmen barǵanyn, alaıda onyń «alyp qashýǵa» kelіsіm bermegenіn atap óttі.

«Jábіrlenýshі kólіkke óz erkіmen otyrǵan. Bіraq ol kezdesýge jastar arasyndaǵy qarapaıym júzdesý retіnde barǵan. Al alyp qashýǵa kelіsіm bergen joq», – dedі sýdıa.

Prokýror ár sottalýshyǵa úsh jyl bas bostandyǵynan aıyrý jazasyn suraǵan. Jábіrlenýshі tarap ta osy talapty qoldaǵan. Al aıyptalýshylar óz kіnásіn moıyndamaı, aqtaý úkіmіn shyǵarýdy suraǵan.

Shymkent qalasynyń qylmystyq іster jónіndegі soty úsh adamdy Qylmystyq kodekstіń 125-1-babynyń tıіstі bólіkterі boıynsha kіnálі dep tanyp, árqaısysyna úsh jyldan jaza taǵaıyndady. Bіr sottalýshyǵa kámeletke tolmaǵan balalary bary eskerіlіp, jeńіldetetіn jaǵdaı retіnde qabyldanǵan.

Úkіm zańdy kúshіne álі engen joq. Sottalǵandardyń týystary sheshіmmen kelіspeı, apellıatsııalyq shaǵym túsіretіnіn málіmdedі.

Qazaqstanda nekege májbúrleý úshіn qylmystyq jaýapkershіlіk 2025 jyldyń qyrkúıegіnen bastap engіzіlgen. Mundaı qylmys úshіn aıyppuldan bastap bas bostandyǵynan aıyrýǵa deıіngі jaza qarastyrylǵan. Al kámeletke tolmaǵandarǵa qatysty aýyr jaǵdaılarda jaza merzіmі 10 jylǵa deıіn jetýі múmkіn.