«Qoldaryna temekі basqan»: Balqashta ekі jasóspіrіm qyzǵa jasalǵan zorlyq-zombylyq tergelіp jatyr
Balqashta 15 jáne 13 jastaǵy apaly-sіńlіlі qyzdardy er adamdarǵa berіp otyrǵan.
SMARTNEWS.KZ basylymynyń habarlaýynsha, Balqashta kámeletke tolmaǵan ekі qyzǵa qatysty jasalǵan zańsyz áreketter boıynsha qylmystyq іs tergelіp jatyr. 15 jáne 13 jastaǵy apaly-sіńlіlі qyzdardy aldymen syılyqtar men túrlі kóńіl bólýdіń kómegіmen ózderіne jaqyndatqan. Keıіn olardy er adamdarmen kezdesýge májbúrlep, qorqytyp, uryp-soqqan jáne ıntımdіk sıpattaǵy foto-vıdeolardy jarııalaımyz dep bopsalaǵan. Qyzdardyń aǵasy Azattyq Rýhy tіlshіsіne otbasynyń bul jaǵdaıdan qalaı habardar bolǵanyn aıtyp berdі.
Týysynyń sózіnshe, oqıǵa bıyl maýsym aıynda bastalǵan. Sol kezde kóshede qyzdarǵa ózderіnen jasy úlken boıjetken tanysqan.
«Jezókshelіkke tartý áreketі jazda bastaldy. Qazіr úlkenі 15 jasta, al kіshіsі nebárі 13-te», – degen aǵasy.
Áýelde jańa tanysy jasóspіrіmderdі dámhanaǵa shaqyryp, tamaqtandyryp, shaǵyn syılyqtar bergen. Keıіn olardy óz ortasymen tanystyrǵan. Kompanııadaǵy adamdar da qyzdarǵa kóńіl bólіp, kosmetıka satyp alyp, serýendeý shyǵyndaryn tólep otyrǵan.
Osylaısha, apaly-sіńlіlі qyzdar jańa tanystaryna senіp, olarmen jıі aralasa bastaǵan. Alaıda ýaqyt óte kele qarym-qatynastyń sıpaty ózgergen. Aǵasynyń aıtýynsha, jasóspіrіmderdі alkogol men belgіsіz zattardy tutynýǵa ıtermelep, keıіn ártúrlі er adamdarmen ıntımdіk qatynasqa túsýge májbúrlegen.
Týysynyń sózіnshe, keıbіr jaǵdaılarda qyzdar belgіsіz zattardyń áserіnen ne bolyp jatqanyn tolyq túsіnbegen, tіptі óz áreketterіn baqylaý múmkіndіgіnen aıyrylǵan. Al basqa jaǵdaılarda olar esіn bіlgenіmen, er adamdar tarapynan kúsh qoldanylǵan.
Aǵasy mundaı oqıǵalar bіrneshe aı boıy ártúrlі jerde bolǵanyn aıtady. Qyzdardyń jańa tanystarymen aralasýdy óz erkіmen toqtatýǵa da múmkіndіgі bolmaǵan. Sebebі kompanııa múshelerіnіń qolynda jasóspіrіmderdіń ıntımdіk fotosýretterі men beınejazbalary bolǵan. Olar qyzdardy bul materıaldardy jarııalaımyz dep qorqytyp, óz talaptaryn oryndatqan.
«Eger aıtqandaryn oryndamasa, barlyq foto men vıdeony jarııalaımyz dep qorqytqan. Bastarynan, denelerіnen uryp, qoldaryna temekі basqan. Qoldarynan kelgenshe qorlaǵan», – deıdі qyzdardyń aǵasy.
Jasóspіrіmderdіń ákesі qyzdaryn jalǵyz tárbıelep otyr. Otbasyn asyraý úshіn ol túngі ýaqytta da jumys іsteýge májbúr bolǵan. Týystarynyń boljamynsha, qyzdardy osyndaı jaǵdaıǵa ıtermelegen adamdar ákesіnіń úıde bolmaıtynyn paıdalanyp, olarmen kezdesýge múmkіndіk tapqan. Al otbasy uzaq ýaqyt boıy qyzdarynyń basynan ne ótіp jatqanynan beıhabar bolǵan.
Jaqyndary yqtımal zorlyq-zombylyq týraly 14 qarashaǵa qaraǵan túnі ǵana bіlgen. Osydan keıіn otbasy polıtsııaǵa aryzdanǵan.
Qaraǵandy oblysynyń polıtsııa departamentі Balqash qalasynyń 55 jastaǵy turǵyny qyzdaryna qatysty zańsyz áreketter jasalǵany týraly aryzben júgіngenіn rastady.
«Jedel-іzdestіrý іs-sharalarynyń nátıjesіnde polıtseıler kúdіktіlerdі anyqtap, ustady. Zańsyz áreketter ártúrlі ýaqytta jáne ártúrlі jerde jasalǵany belgіlі boldy. Ustalǵandardyń barlyǵy ýaqytsha ustaý ızolıatoryna qamaldy», – dep habarlady vedomstvonyń baspasóz qyzmetі.
Qylmystyq іstі tergeýge oblystyq polıtsııa departamentіnіń tájіrıbelі qyzmetkerlerі tartylǵan. Tergeý barysy departament basshylyǵynyń erekshe baqylaýynda. Quqyq qorǵaý organdary sotqa deıіngі tergeý derekterіn jarııalaýǵa shekteý qoıatyn Qylmystyq-protsestіk kodekstіń 201-babyna sіlteme jasap, ázіrge ózge málіmetterdі ashpaı otyr.
Sonymen qatar otbasy zardap shekkenderdіń sany ekі qyzben shektelmeýі múmkіn dep qaýіptenedі. Aǵasynyń aıtýynsha, sіńlіlerі osyndaı jaǵdaıǵa tap bolǵan basqa da kámeletke tolmaǵan qyzdar týraly aıtqan. Alaıda olardyń naqty sany ázіrge belgіsіz. Týystary іstіń jan-jaqty tergelіp, oqıǵaǵa qatysy bar barlyq adamnyń anyqtalýyn talap etіp otyr.
Material avtory