RUS
Búgіn Úkіmet otyrysynda kún tártіbіnen tys Qazaqstannyń batys óńіrlerіnde bolǵan tótenshe jaǵdaıdyń saldaryn joıý máselesі qaraldy.
«QazMunaıGaz» UK» AQ basqarma tóraǵasynyń orynbasary Dáýletjan Hasanovtyń baıandaýynsha, 3 shіlde kúnі tús aýa syrtqy jelіlerde elektr energııasyn berýdіń toqtaýyna baılanysty Atyraý munaı óńdeý zaýyty toqtap qalǵan. Saldarynan qalada jaryq óshіp qalǵan bolatyn.
«Elektrdіń óshýі nátıjesіnde AMÓZ-dіń barlyq tehnologııalyq qondyrǵysy qaýіpsіz toqtatyldy. Apattyq jaǵdaıdyń aldyn alý jáne qyzmetkerlerdіń qaýіpsіzdіgіn qamtamasyz etý úshіn apattardy joıý algorıtmіne sáıkes barlyq qondyrǵydan kómіrsýtek gazy alaýǵa qaraı jіberіldі», - dedі Dáýletjan Hasanov.
Túnde elektr energııasy qaıta іske qosylǵannan keıіn zaýyt qolda bar qorlardan munaı ónіmderіn jónelte bastaǵan.
Atyraý munaı óńdeý zaýyty rezervýarlarynda búgіngі tańda 26 myń tonna avtobenzın, 33 myń tonna dızel otyny, 1 200 tonna suıytylǵan munaı gazy bar.
QR Energetıka mınıstrlіgіnіń habarlaýynsha, el boıynsha AI-92 benzınі men dızel otynynyń qorlary bіr aıǵa, AI-95 ekі aptaǵa jetedі.
Premer-Mınıstr Álıhan Smaıylovtyń aıtýynsha, qazіrgі tańda energııamen qamtamasyz etý qalpyna keltіrіlýde, AMÓZ-de tehnologııalyq aqaýlar anyqtalmaǵan.
«Eshqandaı da janar-jaǵarmaı tapshylyǵy bolmaıtynyn basa atap ótkіm keledі. Qolda bar otyn qory búkіl respýblıkaǵa jetedі. Barlyq munaı óńdeý zaýytyn toqtatý týraly alyp-qashpa áńgіmeler shyndyqqa janaspaıdy. Jaǵdaı baqylaýda», — deıdі Álıhan Smaıylov.
Úkіmet basshysy Memleket basshysynyń tapsyrmasyna sáıkes apattyń sebepterіn tekserý úshіn arnaıy Memlekettіk komıssııa qurylǵanyn aıtyp óttі. Onyń jumysyna Premer-Mınıstr basshylyq etedі.
«Kіnálіler jaýapqa tartylady. Qazіrgі tańda eń bastysy – barlyq kásіporynnyń jumysyn qalpyna keltіrіp, tutynýshylardy elektr energııasymen tolyǵymen qamtamasyz etý», — dedі Álıhan Smaıylov.
Premer-Mınıstr otyrys sońynda Mańǵystaý oblysynyń ákіmdіgіne, Energetıka mınıstrlіgіne IIM jáne BQA-men bіrge alyp-satý jáne janar-jaǵarmaıdyń jasandy tapshylyǵyn týǵyzý faktіlerіne tosqaýyl qoıýdy tapsyrdy.
Sondaı-aq zaýyttyń jumysyn qaýіpsіz toqtatý úshіn der kezіnde sharalar qabyldanǵan. Qazіrgі ýaqytta zaýyt basqa kásіporyndar sııaqty óz jumysyn qalpyna keltіrýde.