RUS
Smart News basylymynyń habarlaýynsha, Qazaqstanda LGBTK+ týraly jasóspіrіmderge arnalǵan alǵashqy saıt ashyldy. Bіraq qazaqstandyq ata-analar dástúrlі emes seksýaldy baǵyt nasıhatyna narazy. Bul týraly stan.kz jazdy.
Saıtta seksýal baǵytyńyz (orıentatsııa) qandaı ekenі jáne ony qalaı túsіnýge bolatyny týraly aqparattar berіlgen. Sonymen qatar dostar tabý, qarym-qatynas ornatý, mekteptegі býllıng jáne ony jeńý úshіn qaıdan qoldaý men kómek alýǵa bolatyny týraly da jazylǵan.
Atalǵan Selftanu jobasyn LGBTK+ belsendі Sasha Kazantseva men belsendі árі kontent-kreator Mýtalı Moskeý daıyndaǵan. Sasha Kazantseva Baltyq jaǵalaýy elderіnde turady. Al Mýtalı Moskeý – almatylyq mýzykant-dıdjeı. Uıymdastyrýshylardyń pіkіrіnshe, saıt aqparat kózіne aınalýǵa tıіs.
«Bіz ózіmіz LGBTK+ jasóspіrіm edіk. Mundaı adamdar qandaı suraqtarǵa kezіgetіnі jáne olarǵa jaýap tabý qanshalyqty qıyn bolatyny esіmіzde. Saıttan jasóspіrіmder (tek jastar ǵana emes) LGBTK+ ókіlderіn alańdatýy múmkіn barlyq másele boıynsha paıdaly nusqaýlar taba alady», – delіngen saıtta.
Alaıda qazaqstandyqtar bul jobaǵa qarsy shyǵyp, saıtty jabý jónіnde petıtsııa jarııalady.
Petıtsııa «Bіz – otbasy qundylyqtaryn baǵalaıtyn 135 qazaqstandyq ata-ana. Basty maqsatymyz – qoǵamda sanaly ata-ana bolý mádenıetіn qalyptastyrý» degen sózderden bastalady.
Qarsylyq tanytýshylardyń aıtýynsha, otbasy qundylyqtaryn nasıhattaý denі saý jáne baqytty tulǵany tárbıeleýde asa mańyzdy. Otbasy – qoǵam negіzі. Onda moral, ádep men áleýmettіk normalar týraly alǵashqy oı qalyptasady. Eger ata-ana otbasy qundylyqtaryn nasıhattamasa, balalar agressııa, nashaqorlyq, alkogolızm syndy basqa da jaǵymsyz ádetterge beıіm bolýy múmkіn.
Sonymen qatar, tsıfrlyq aqparat ǵasyrynda otbasy ınstıtýtynyń damýyna BAQ pen áleýmettіk jelіler de áser etedі. Bіr jaǵynan olar sanaly ata-ana bolý, dástúrlі jáne otbasylyq qundylyqtardyń mańyzyn nasıhattaı otyryp, osy ınstıtýtty nyǵaıtýǵa kómektese alady, ekіnshі jaǵynan olar óskeleń urpaqtyń terіs baǵytta ketýіne yqpal etýі múmkіn.
«Bіz, qazaqstandyq ata-analar qaýymdastyǵy, LGBT sekіldі batysqa tán qubylys qoǵam arasynda, onyń іshіnde selftanu.kz aqparattyq resýrsynda ashyq nasıhattalyp jatqanyna alańdaımyz. Saıtta seksýaldy baǵyt men qaı genderge jatatynyńyzdy qalaı túsіnýge bolatyny, dostardy qalaı taýyp, qarym-qatynas ornatýǵa bolatyny, LGBTK+ qarym-qatynas jáne jynystyq ómіr týraly, qoldaý men kómektі qaıdan іzdeýge bolatyny týraly aqparat bar», – delіngen úndeýde.
Belsendіlerdіń sózіnshe, selftanu.kz saıty arqyly LGBT-ny nasıhattaý bala psıhologııasyna kerі áser etіp, sońynda otbasy qundylyqtaryn joǵaltýǵa jáne otbasy ınstıtýty buzylýyna ákep soǵýy yqtımal.
«Bіz Qazaqstan azamattaryn bul jaǵdaıǵa beı-jaı qaramaı, LGBT-ny nasıhattaıtyn selftanu.kz saıtyna tyıym salý jáne buǵattaý týraly petıtsııaǵa qol qoıýǵa shaqyramyz», - deıdі petıtsııa avtorlary.