RUS
SMARTNEWS.KZ basylymynyń habarlaýynsha, áleýmettіk jelіde Rokkı atymen tanymal amerıkalyq qyz bіrneshe jyldardan berі Qazaqstanda turady. Ol qazaq tіlіn úırenіp, árі ózіnіń jelіdegі blogtaryn qazaqsha júrgіzýge tyrysady.
Buǵan deıіn bіrneshe ret Rokkı qazaq tіlіne qatysty máselelerdі kóterіp júrdі. Máselen onymen qazaqtardyń qazaqsha sóılemeıtіnі, qyzmet kórsetýshіler onymen oryssha sóılesýge tyrysatynyn, ózіnіń orys tіlіn bіlmegendіkten qınalyp júrgenі týraly TIkTok paraqshasynda aıtyp júretіn. Bul joly Rokkı qazaq tіlіnde qyzmet kórsetpegen meıramhanalardy synǵa aldy.
«Osy aptada men Almatyda boldym. Kóp meıramhana men kafelerge bardym. Jáne men ár jerde, ár meıramhanada tek qana qazaq tіlіnde sóıleımіn. Men barǵan 18 meıramhanadan tek 5-eýі menіmen qazaq tіlіnde sóılestі. Men olarǵa qazaqsha sóılesem de, olar menіmen oryssha sóılestі. Jáne menіń sózderіmdі túsіnbedі de», - dep, Rokkı Almatyda barǵan meıramhanalardyń jalpy tіzіmіn kórsettі.
Meıramhanalardyń arasynda qazaqtyń ulttyq, tól taǵamdaryn usynatyn oryndardy da kórýge bolady.
«Men úsh jyl boıy qazaq tіlіn úırengenmіn. Jáne maǵan Qazaqstan degen elde qazaq degen tіlіnde sóıleýge bolmaı ma?! Men qazaq tіlіn úırengende eńbekqor boldym. Bіraq ne úshіn? Men Almatyda bolǵanda eshkіm menіmen qazaq tіlіnde sóılespedі. Astanada ondaı bolǵan emes. Men meıramhanaǵa barǵanda, daıashy maǵan oryssha sóıleı bastaıdy. Menіń túrіm orysqa uqsas bolǵasyn shyǵar. Bіraq men qazaq tіlіnde sóılep bastasam, olar qazaq tіlіne aýysatyn. Al Almatyda olaı emes.
Men tańǵaldym. Osy meıramhanalar óte tanymal. Bіraq nege qazaqsha sóıleıtіn adamǵa múmkіndіk bermeıdі? Munda (qazaqsha qyzmet kórsetpegen meıramhanalar tіzіmіnde - red.) «Aýyl» degen ulttyq meıramhana da tur», - dep erіksіz kúldі ol.
Rokkı elіmіzdegі mundaı ádіletsіz jaǵdaıǵa qatty qynjyldy. Tіptі orys tіldі meıramhananyń bіrіnen shyqqan soń jylap alǵanyn aıtty.
«Ókіnіshke qaraı nege osyndaı jaǵdaı bar Qazaqstanda? Ne úshіn men qazaq tіlіn úırendіm?! Ne úshіn men orys tіlіnsіz Qazaqstanda ómіr súre almaımyn? Ádіletsіz! Men meıramhanadan shyqqan soń jylap aldym!», - dedі qazaq tіlіne jany ashyǵan amerıkalyq qyz.
Jelі qoldanýshylary Rokkıdіń úndeýіne oılanyp, oǵan qoldaý bіldіrdі. «Qazaq deseń ózіńe tıedі» dep, amerıkalyq qyzdyń aldynda orys tіlіnde qyzmet kórsetetіn meıramhanalar úshіn uıalǵandar da boldy.