RUS
SMARTNEWS.KZ басылымының хабарлауынша, Швеция премьер-министрі Ульф Кристерссон Euronews арнасына берген сұхбатында миграциялық жағдайды бақылауға алу – «абсолютті қажеттілік» екенін айтып, елге оралғысы келетін мигранттарға берілетін қаржылай көмекті 900 еуродан 32 000 еуроға дейін арттыруды қолдады.
Қазіргі таңда Швеция мигранттарға өз еркімен елінен кетіп, Отанына оралғаны үшін 900 еуро көлемінде төлем ұсынады. Алайда бұл бастама аса нәтиже берген жоқ: Швецияның көші-қон агенттігінің дерегінше, 2023 жылы 70 өтінімнің тек біреуі ғана мақұлданған.
Осы жағдайды өзгерту үшін үкімет 2026 жылдың 1 қаңтарынан бастап бұл соманы 32 000 еуроға дейін өсіруді көздеп отыр – бұл бұрынғыдан 3400 пайызға артық.
Кристерссон бұл саясатты Дания тәжірибесіне сүйене отырып әзірлеп жатқанын айтты. Көрші ел өз еліне қайтару бағдарламасы арқылы 22 мың адамды нысанаға алған.
«Біз дат моделін көшіріп жатырмыз. Бұл бастама – өз елінде өмір сүруді артық санайтындарға нақты мүмкіндік. Олар Швецияда өз болашағын көрмесе, Отанына оралу – дұрыс шешім», – деді премьер.
Ол бұл тәсіл бәріне бірдей ұнамауы мүмкін екенін мойындады, бірақ интеграция мәселесін ашық көтерді:
«Егер елде заңды түрде тұратын адамдар швед қоғамына бейімделе алмаса, Швецияның өмір салтын құрметтемесе, онда олар өз елдеріне оралу туралы ойланып көруі керек», – деп түйіндеді ол.
Швеция премьер-министрі Ульф Кристерссон ЕО-ның жаңа Миграциялық пакті секілді реттелетін көші-қон саясатын қолдайтынын жеткізді. Ол паналауға өтініш білдіріп, теріс жауап алғандар Еуропада қалып қоймауы керек деп санайды.
«Қазір босқын мәртебесіне өтініш білдіргендердің шамамен 80 пайызы теріс жауап алып, соған қарамастан Еуропада қала береді. Бұл – мүлдем жол беруге болмайтын жағдай. Ал Швецияда біз бұл мәселені бақылауға алдық. Қазір теріс жауап алғандардың тек 20 пайызы ғана елде қалып отыр. Бұл – біз үшін маңызды жетістік», – деді премьер.
Кристерссонның айтуынша, Еуропа елдерінің көші-қонға деген көзқарасы айтарлықтай өзгеріп жатыр. Бұл жағдай келешекте саяси шешімдер қабылдауды жеңілдетеді деп есептейді.
Айта кетейік, жуырда Еуропалық комиссия заңсыз мигранттарды елдеріне қайтару процесін жеделдетуге бағытталған жаңа шараларды ұсынды.