RUS
SMARTNEWS.KZ басылымының хабарлауынша, Орал қаласында 9 жастағы Ануар Рахимов ток соғып ауыр жарақат алып, екі күннен кейін ауруханада қайтыс болды. Қайғылы оқиға 30 сәуір күні Исатай-Махамбет көшесіндегі №82 үйдің маңында болған.
Куәгерлердің айтуынша, балалар футбол ойнап жүргенде, доп электр қосалқы станциясының төбесіне түсіп қалған. Ануар оны алмақ болып төбеге көтерілгенде, ток ұрып, 95% денесін күйік шалды. Оқиға орнында өрт шыққан.
Баланың анасы Турсынгүл Бисекенова қайғылы оқиғаның мән-жайын айтып берді.
«Сағат 19:00-де далаға шықты, 19:20-да үлкен ұлыма достары қоңырау шалып, інісі құлап, жедел жәрдем шақыртқанын айтты. Далаға жүгіріп шықтық. Балам жалаңаш, көмірге айналып кеткендей жатты. Тірі жері қалмаған. Бірақ ол кезде тірі еді», – дейді анасы.
Бала ағаштың бұтағы мен тақтайға сүйеніп, станция төбесіне көтерілген. Допты жерге түсірген соң, қорқып, басқа жақтан түспек болғанда, 10 мың вольттық ток ұрып, аяғы ілініп, электр сымына қолы тиіп, қатты жараланған.
«Балалар айқайлап, көмек шақырды. Бір ер адам келіп, баламды жерге түсіріп, үстіндегі киімін шешіп, алғашқы көмек көрсете бастаған. Мен өзім баламды танымай қалдым», – дейді көз жасын тыя алмаған ана.
Дәрігерлер екі күн бойы өмірі үшін күрескен. Алғашқы күні оң қолы мен аяғы ампутацияланған, алайда 1 мамыр күні сағат 22:30-да Ануар көз жұмды.
Анасының айтуынша, олар тұратын тоғыз қабатты үйде 200-ге жуық отбасы тұрады, бірақ балалар ойнайтын алаң жоқ.
«Бұрын салынған ойын алаңында доп тебуге тыйым салынған, өйткені ол кішкентай балаларға арналған. Сондықтан балалар үйдің артында, қоқыс маңында, қоршаусыз жерде ойнайды. Доп ұшып кетпес үшін ең болмағанда төрт метрлік тор қойылуы керек еді. Электр станциясы да қоршалуы тиіс. Бүгін менің балам көз жұмды, ертең басқаның баласы дәл осылай жапа шегуі мүмкін», – деді ол.
Турсынгүл Бисекенова мемлекеттік органдардың жауапсыздығына ашынып, кінәлілер жазалануы тиіс екенін айтты.
«Бір тал ағаштың бұтағына сым ілініп тұр. Ертең найзағай түссе, бүтін үй өртенеді. Біз салық төлейміз, КСК-ға ақша өткіземіз. Бірақ ешкім жағдайды түземейді. Балам №1 мектептің 3-сыныбында оқыды. Ең кенжем еді. Жүрегім жарылып барады», – деді Ануардың анасы.
Қазіргі таңда полиция тергеу амалдарын бастады.