RUS
Бұрынғы мемлекет басшысы әрі 2024 жылы өтетін президент сайлауына Республикалық партияның атынан үміткер болғалы отырған ол іскерлік құжаттарды қолдан жасады деген айыптың 34 тармағы бойынша кінәсін мойындаған жоқ.
Аталған айыптаулар Трамптың 2016 жылғы президенттік науқаны кезінде порноактриса Сторми Дэниэлске ауызбастырық ретінде төлеген ақшаға қатысты болып отыр.
Axios деректеріне сүйенсек, 2000 жылдан бері кемінде 78 елде, оның ішінде Еуропада тақтан түскен мемлекет басшылары түрмеге тоғытылып немесе жауапқа тартылыпты.
Хорватияда бұрынғы үкімет басшысы Иво Санадер жемқорлық әрекеті үшін айыпталып, 8 жылға бас бостандығынан айырылды. Бүгінде ол жазасын өтеп жатыр.
Францияда бұрынғы екі президентіне айып тағылды.
Алдымен Жак Ширак сотталды. Ол 2011 жылы жемқорлық үшін істі болып, 2 жылға шартты жаза арқалады. Ол сондай-ақ Париж мэрі болып тұрған кезінде қызмет бабын жеке мүддесіне пайдаланғаны, сенімді асыра пайдаланғаны және қаражатты оңды-солды шашқаны үшін кінәлі деп танылды.
Екіншісі - Николя Саркози. Оның 2021 жылы жемқорлармен ауызжаласып және бәз біреулерді ақшаға қолпаштағаны әшкере болды. Осылайша 3 жыл бас бостандығынан айырылды. Бүгінде ол осы жазаның шартты 2 жылына қатысты істі қайта қарауға шағым түсірген жайы бар.
Германияда Кристиан Вульф та жоғарыдағылардың кебін киді. Бұрынғы президент қызметтік міндеттерін орындау кезінде қызмет түрін пайдаланғаны үшін сот алдынан бір-ақ шықты. Дегенмен ол 2014 жылы абыройын ақтап шықты.
Пара алды деп айыпталған Италияның бұрынғы премьер-министр Сильвио Берлусконидің 2021, 2022 және 2023 жылдары өткен үш сот процесінде қылмысы ақыры дәлелденген жоқ.
Берлускони саясатқа келген 1994 жылдан бері үстінен 30-дан астам қылмыстық іс қозғалыпты.
Португалияда бұрынғы үкімет басшысы Жозе Сократешке жемқорлықпен айналысты деген айыптар тағылып, алайда судья олардың барлығын жоққа шығарып, тек ақша жылыстатуға қатысты кінәлі деп тапты.
Соңғы жиырма жылда мемлекет басшылары жиі-жиі істі болған жалғыз ғана аймақ бар - ол Латын Америкасы. Мысалы, Перуде 1985 жылдан бері тақта отырған президенттердің біреуінен өзгесі дерлік абақтыға қамалып немесе айып тағылған.