Канье Уэсттің Алматыдағы концерті: Орталық стадионға кіру тәртібі жарияланды
Әр билет санаты мен секторға сәйкес жеке кіреберіс белгіленіп, қауіпсіздік талаптарын сақтау міндеттелді.
Канье Уэсттің Алматыдағы концертіне дайындық аясында Орталық стадионға көрермендерді кіргізу тәртібі жарияланды. Ұйымдастырушылар қауіпсіздік талаптарын сақтау үшін әр билет санаты мен секторға сәйкес белгіленген қақпаны пайдалануды сұрады.
Көрермендер стадионға кірер алдында билеттегі сектор нөмірін тексеріп, өзіне тиесілі кіреберісті алдын ала анықтауы қажет. Бұл кезекте уақыт жоғалтпауға және стадион аумағындағы адам ағынын реттеуге мүмкіндік береді.
Кіру қақпалары қалай бөлінген?
BRONZE санатындағы билеттері бар көрермендер Сәтбаев көшесі жағындағы №3 кіреберіс арқылы өтеді. Бұл қақпа 1–7, 10–13 және 30–60 секторларына арналған.
8–9 және 14–28 секторларында орындары бар көрермендер, сондай-ақ GOLD, SILVER санаттары мен барлық ложалардың билет иелері Байтұрсынов көшесі жағындағы №1, №2 және №4 қақпаларды пайдаланады.
Ал 8–9 және 14–28 секторларындағы билеттер, GOLD және SILVER санаттары мен барлық ложалар үшін Абай даңғылы жағындағы №5 және №6 қақпалар да қарастырылған.
Орталық стадион аумағына көрермендерді кіргізу сағат 16:00-де басталады. Ұйымдастырушылар қауіпсіздік шараларын тиімді ұйымдастыру және кезекте ұзақ тұрмау үшін стадионға алдын ала келуге кеңес берді.
Қауіпсіздік талаптары
Концертке барар алдында көрермендер билеттегі ақпаратты мұқият тексеріп, билет санаты мен сектор нөмірін тиісті кіреберіспен сәйкестендіруі керек.
Басқа қақпа арқылы кірген жағдайда қажетті секторға жету үшін қосымша уақыт жұмсалуы мүмкін. Сондықтан ұйымдастырушылар көрермендерге бірден билетіне сәйкес белгіленген кіреберіске бағыт алуды ұсынды.
Сонымен қатар концерт өтетін уақытта қала көшелерінде көлік қозғалысына шектеулер мен уақытша жабылулар енгізілуі мүмкін. Осыған байланысты көрермендер жол бағытын алдын ала жоспарлағаны жөн.
Ұйымдастырушылар стадион аумағында қоғамдық тәртіп пен қауіпсіздік талаптарын сақтауды, сондай-ақ қауіпсіздік қызметкерлері мен басқа да жауапты мамандардың нұсқауларын орындауды сұрады.