RUS
Қала тұрғындарының көкейдегі түйткілді мәселелерін тиісті мекеме өкілдері мен аудан әкімінің құлағына жеткізуге мүмкіндігі туды.
Өз мәселесін тікелей жеткізген белсенді тұрғындардың бірі – Аман, Байқоңыр ауданының көп бөлігі біртіндеп өмір сүруге қолайсыз болып бара жатқанын қозғады. Ол аудан әкімі Ерлан Жаулыбаевтан өзге өңірлермен, оның ішінде Павлодар, Көкшетау қаласымен жалғап тұрған трассалардың шектеулі екенін, базар мен ТЭЦ-тер, өндірістік зоналардың көбейіп, адам өмір сүруіне ыңғайсыз тұсын көтерді.
— Алаш шоссесінде әрқашан кептеліс. 6 жолақты жол болса да, үнемі солай. Бұлай жалғаса берсе, шосседегі ондаған жылдардан бері тұрған көпір бір күні құлайды. Денсаулық сақтау орталықтары мен білім беру орталықтары тек сол жағалаудың орталық шағын аудандарында қамтамасыз етілген. Адамдар жұмыс үшін сол жағалауға қатынаумен болады, - дейді тұрғын.
Бұл мәселеге қатысты Астана Бас жоспары ҒЖЖИ ЖШС директорының орынбасары Серік Әбдірахманов мынадай жауап қайтарды:
— 2016 жылғы бас жоспарда барлық қажеттілік бір орталыққа жиысқан еді. Адамдар үнемі сол жағалауға қатынаумен болды. Енді біз ұсынып отырған жаңа бас жоспарда бір әр ауданның шығыс трассаларының бойында өзіне тиесілі полицентрін құрмақпыз. Осылайша шет жақтағы тұрғындар орталыққа қарай қатынауына қатты қажеттілік тумайды, - деп түсіндірді спикер.
Сондай-ақ Серік Әбдірахманов аудандағы агломерация жайын қозғады. Байқоңыр ауданына жақын орналасқан ауылдарға өндірістік обьектілерді салу жоспарда екенін атап кетті.
Еске сала кетсек, Байқоңыр ауданы - Астанадағы көлемі үлкен бірақ адам аз тұратын аудандардың бірі. Ауданда шамамен 200 мыңдай адам тұрақтаған. Байқоңырдың көп бөлігін ескі қалашықтар, үйлер мен өндірістер орналасқан жерлер алып жатыр.