Алматыда тұрғындар көршісінің «балконнан боқ төгетінін» айтып шағымданды

SMARTNEWS.KZ басылымының хабарлауынша, Алматыдағы көпқабатты үйдің тұрғындары 12 жылдан бері санитарлық талапқа сай емес жағдайда тұрып жатқан көршісіне қатысты шағымданды. Айтуларынша, ер адам жуынбайды, үй жинамайды, қоқысын жинап, нәжісімен бірге балконнан лақтыра береді. Бұл туралы КТК арнасы жеткізді.

Тұрғындар көршілерінің әрекетінен мезі болғанын айтады. Олар бірнеше мәрте өз күшімен оның пәтерін жинап, тазалап берген. Тіпті ақша жинап, арнайы адам жалдап та көрген. Алайда нәтиже болмаған – уақыт өте үй қайтадан қоқысқа толып қалған.

«Бірнеше рет сөйлестік, көмектестік, үйін тазалап бердік. Бірақ бәрі бекер. Бұл адамды енді түзей алмаймыз», – дейді көршілер.

Ер адам пәтерге коммуналдық төлем төлемегендіктен, жарық, су, жылу ажыратылған. Кәріз жүйесі де істемейді. Көршілердің айтуынша, ол дәретті пакетке сындырып, терезеден лақтырады. Ал жағымсыз иіс тек өз пәтерінде емес, бүкіл подъездге жайылған.

Болжам бойынша, ер адам – балалар үйінің түлегі. Жасы 30-дан асқан. Өзінің айтуынша, жұмыс істейді. Бірақ тұрғындар оның нақты қайда жұмыс істейтінін білмейді.

Қазір көршілер оны пәтерден шығаруды талап етіп отыр. Алайда учаскелік полицейлердің бірнеше ескертуінен әріге аспаған. Шарасыз қалған тұрғындар бұл мәселені тек сот немесе әлеуметтік мекемелердің араласуымен ғана шешуге болады деп отыр.