RUS
SMARTNEWS.KZ басылымының хабарлауынша, Павлодарда Bellagio банкет залында өткен отырыстан кейін 67 адам медициналық көмекке жүгінген. Олардың басым бөлігінде сальмонеллёзді энтерит анықталған. Бұл туралы @Pavlodarnews.kz жазды.
Облыстық прокуратураның мәліметінше, ҚР Қылмыстық кодексінің 304-бабы 1-бөлігі бойынша (санитарлық ережелерді немесе гигиеналық нормативтерді бұзу, салдарынан адамдардың жаппай ауруы, улануы немесе сәуле алуы) сотқа дейінгі тергеу басталған.
Аталған бап бойынша айыпты деп танылған тұлға 2000 АЕК-ке дейінгі мөлшерде айыппұлмен, не дәл сондай көлемде түзету жұмыстарымен, не 600 сағатқа дейінгі қоғамдық жұмыстарға тартумен, не екі жылға дейін бас бостандығын шектеу немесе айыру жазасына кесілуі мүмкін.
Еске салайық, 7 маусым күні Bellagio мейрамханасында ұзату тойы өткен. Кейін жиырмадан астам қонақ өзін жайсыз сезініп, кейбірі ауруханаға жеткізілген. 8 маусымда тағы бір отбасылық жиыннан кейін жұқпалы ауруханаларға жаңа науқастар түсе бастаған — бұл жолы мерейтой қонақтары уланған.
Санитарлық тексеріс нәтижесі бойынша ресторандағы дайын тағамдардың, шикізат пен аспаптардың сынамаларынан сальмонелла, алтын түсті стафилококк, ішек таяқшасы анықталған.
Оқиғадан соң Bellagio ұжымы Instagram парақшасында банкет залын жабатынын және команданың таратылатынын мәлімдеді. Олар осы уақытқа дейін залда той жасаған барлық той иелеріне алғысын айтты.