RUS
SMARTNEWS.KZ басылымының хабарлауынша, Ресей Украинамен келіссөздердің үшінші раундына қатысуға әзір. Бұл туралы Беларуське сапары аясында өткен баспасөз мәслихатында Ресей президенті Владимир Путин мәлімдеді.
Оның айтуынша, келіссөздердің күн тәртібінде екі ел ұсынған — мазмұны мүлде қарама-қайшы — меморандумдарды талқылау тұруы тиіс.
«Келіссөздер — шешім іздеу үшін жүргізіледі», — деді ол.
Бұған дейін Ресей мен Украина делегациялары Ыстамбұлда екі рет — 16 мамыр мен 2 маусымда кездескен. Соңғы кездесуде тараптар бір-біріне бейбітшілікке қол жеткізу жолына қатысты өз нұсқаларын жазған құжаттарын табыстаған. Украина кемі 30 күнге ешқандай шартсыз атысты тоқтатуды талап етуде, ал Ресей келісім үшін бірқатар талап қойып отыр.
Киев келіссөздер техникалық деңгейде емес, президенттер деңгейінде жалғасуы керек деп есептейді. Алайда Путин мұндай кездесуге қарсы: ол екі ел басшылары кездескенше, ең алдымен бейбіт келісімнің негізгі қағидалары келісіліп алуы керек деп санайды. Сонымен қатар ол бірнеше рет Зеленскийді Украина президенті ретінде заңсыз деп есептейтінін ашық айтқан.
Бірақ Ресей басшысы АҚШ президенті Дональд Трамппен кездесуге қарсы емес екенін білдірді. Минскіде сөйлеген сөзінде ол АҚШ пен Ресей қарым-қатынастары біртіндеп қалыпқа келе бастағанын айтып, Трамптың Украинадағы соғыс қимылдарын тоқтатуға ұмтылысын құрметпен қабылдайтынын жеткізді. Путиннің айтуынша, Мәскеу Трамппен кездесуге «қуана дайындалады».
Путин сонымен бірге Киевке қаза тапқан тағы 3 мың украин сарбазының мәйітін беруге дайын екенін айтты. Бұған дейін Ресей тарапы 6 мыңдай денені қайтарған болатын.
Бұл мәлімдемелер Украина қалалары мен аумағына шабуылдар жалғасып жатқан тұста жасалып отыр. Соңғы шабуылдардың бірі Днепр қаласына жасалып, 21 адамның өмірін қиған. Қаза тапқандар саны әлі де өсуі мүмкін.
Санкт-Петербургте өткен экономикалық форумда сөйлеген сөзінде Путин Украинаға ескерту жасап, егер келіссөздерден бас тартса, болашақта бейбіт шарттар бұдан да қиын болуы мүмкін екенін айтқан. Ал Зеленский бұған дейін қазіргі «техникалық делегациялар деңгейіндегі» форматтағы кездесулерді жалғастырудың мәні жоқ деп мәлімдеген еді.
Украина мен бірқатар еуропалық мемлекеттер Ресей шын мәнінде бейбіт келіссөздер жүргізуге мүдделі емес, тек дипломатиялық имитация жасап, АҚШ-пен қарым-қатынасты шиеленістіріп алмауға тырысып отыр деп санайды.