RUS
SMARTNEWS.KZ басылымының хабарлауынша, 4-сынып оқушысы бүгінде метал пластиналар мен сымдардан өз қолымен шашақ, шашбау, сырға, шолпы, білезік пен алқалар жасайды. Асылжанның жасаған бұйымдары қыз-келіншектер арасында сұранысқа ие.
Асылжанның анасы Балауса 28 жаста, төрт баланың анасы. Асылжан – үйінің үлкені. Балауса аутизм диагнозы қойылған балаларға арналған даму орталығында жұмыс істеп жүріп ұсақ моториканың балалар үшін маңызы зор екенін ұғынған. Ақыл саусақтардың ұшында болатынын түсінген ол балаларының ұсақ моторикасын дамытуға барын салады.
Келіншектің ұлдары үшін тапқан ермегі балаларының сүйікті ісіне айналды. Балауса қазақи нақыштағы әшекей-бұйымдар жасап, кәсіп бастаған. Сұраныстың көптігінен ол ұлы Асылжаннан өзіне көмектесуін сұрайды.
“Әшекей-бұйым жасау – жұмыс. Сәйкесінше, Асылжанға еңбегі үшін ақы төлеуім керек. Бір бұйым үшін Асылжан 500 теңге алады. Екеуіміз 1000-нан астам бұйым жасадық. Ағасына қарап Әкежан да бұйым жасайды. Әкежан сырға жасауды үйреніп алды”, – дейді Балауса.
Келіншектің айтуынша, қазір ұлдары ата-анасынан ақша сұрамайды. Қазір олар табысын арттыруды ойлап жүрген көрінеді. Асылжанның әкесі де қолөнер шебері. Көлік рульдерінің қаптарын жасайды. Асылжан мен Әкежан оған өрнек салады. Әр дайындалған материал үшін олар 100 теңгеден алады. Осылайша ол үш айдың ішінде ақша жинап, оған жаңа смартфон, інісі екеуіне велосипед алды. Сондай-ақ Балауса отбасымен шетелге шығу үшін ақша жинап жатқанын айтты. Бүгінде олар жарты миллион теңге жинап үлгерген. Қаражаттың қалғанын Наурыз кезінде әшекей-бұйымдар сатып, жинаймыз деген үмітте. Анасы мен баласы қыз-келіншектер білезік, шашқа тағатын бұйымдар мен алқалардан бөлек шекелікке жиі тапсырыс беретінін айтады
Асылжанның мектептегі сынытастары мен ұстаздары оның немен айналысатынын білгенде 8-наурыз мерекесіне қыздарға не сыйлаймыз деп бас ауыртпай, әшекей-бұйымға тапсырыс берген.
“Сыныптағы қыздарға сыйлыққа береміз деп Асылжанның бұйымдарына тапсырыс берді. Қыздардың бәрі риза. Ал Әкежан сүйікті мұғаліміне сырға жасап беретінін айтты. Әрине, балаларым көп жұмыс істеп, ақша тапқысы келеді. Бірақ күйеуіміз екеуіміз оларға барлығын тең ұстау керегін айтамыз. Балаларым оқуға да, жүзу, таэквондо, футбол сияқты басқа да нәрселерге уақыт бөлуі керек”, – дейді Балауса Қаныбекова.
Асылжан бұйым жасауға күніне бір-ақ сағат уақыт бөлетінін айтады. Кей бұйымдарды 5-10 минутта жасаса, күрделі әшекейлерді жасауға бір сағат уақыты кетеді екен.