RUS
SMARTNEWS.KZ басылымының хабарлауынша, Эфиопияда нағыз халықаралық дауға айнала жаздаған қызық оқиға болды: ауыл тұрғындары Швециядан ұшып келген шағаланы тыңшы деп ойлап, қолға түсірген.
Бәрі құстың арқасына бекітілген электронды құрылғыны байқаған сәттен басталған. Жергілікті жұрт бұны тыңшылық құрал деп санап, құсты ұстап алып, құрылғыны тексере бастаған. Трекердің бетінде электронды пошта мекенжайы болған – ашуға мінген эфиопиялықтар сол адреске жүздеген ашулы хат жіберген.
Алайда көп ұзамай белгілі болғандай, бұл құрылғы жай ғана құстардың көшу бағытын бақылауға арналған GPS-трекер екен. Ал пошта мекенжайы – Швециядағы Birdlife Sweden атты табиғатты қорғау ұйымына тиесілі.
Орнитологтар жағдайды түсіндіріп, эфиопиялықтардан құсты босатуды өтінген. Себебі шағала Швецияға оралып, ұрпақ өрбітуі тиіс болған. Бірақ еш жауап келмеген, ал құрылғының сигналы мүлде жоғалған...
Орнитологтар ауыл тұрғындарының алаңдаушылығына түсіністікпен қараған. Birdlife Sweden жетекшісі Никлас Аронссон:
«Бұл аймақта қарулы қақтығыстар болып жатыр. Сондықтан құстар немесе құс пішініндегі дрондар шпионаж мақсатында жиі пайдаланылады», – деп мәлімдеді.
Ғалымдар жануарлардың шпион ретінде қолданылған басқа да нақты оқиғаларды еске салды. Мысалы, ЦРУ кезінде тыңшы көгершіндер мен микрофон орнатылған мысықтарды, ал Қытай өткен жылы қанат қағып ұшатын құс-дронды таныстырған. Тіпті, қарапайым адам көзбен ажырата алмай қалуы мүмкін.
Яғни, бұл жолы жай ғана шағала болса да, «тыңшылық» күдігі әсте негізсіз емес сияқты.