RUS
SMARTNEWS.KZ басылымының хабарлауынша, конференцияда ақын мұрасын таныту мақсатында әзірленген «Ілияс әлемі» оқу-танымдық сайты таныстырылды.
Сайт «Ілиястану», «Ақынның өмірі, «Шығармашылығы», «Зерттеулер», «Медиа», «Жаңалықтар», «Біз туралы» сынды негізгі 7 бөлімнен тұрады.
Танымдық портал білім алушылардың ой-өрісін кеңейтіп, практикалық дағдыларын дамытып, ақпаратты неғұрлым құрылымды және түсінікті түрде алуға мүмкіндік береді.
«Ақпарат ағынының күрт өсуіне және цифрлық технологиялардың қарқынды дамуына байланысты жоғары оқу орындарының қызметінде білім беру сайттарын қолдану рөлі артып келеді. Деректер мен мәліметтерді цифрландыру бәсекеге қабілетті тұлғаның құзіреттілігін қалыптастыруда маңызы зор», - дейді ілиястанушы Шара Кыяхметова.
Конференция модераторы оқу орнының Басқарма төрағасы-ректор Ермек Бөрібаев ақын мұрасын дәріптеуде университеттің ілиястанушы ғалымдарының еңбегі зор екенін айтты.
«Ілиястану ғылыми-практикалық орталығының қызметкерлері ақын мұрасын жаңаша көзқараста зерттеп, жүйелеп, бүгінгі күнге 32 ғылыми еңбек, оның ішінде 6 монография, 5 оқу құралы, 2 хрестоматия, 18 оқулық, 1 энциклопедия шығарды», - деді ректор.
Шараға арнайы келген ақынның немересі Динара Жандосова Ілияс Жансүгіров шығармашылығын зерттеу, жинақтау, насихаттау бойынша игі істер атқарып жатқан университет ұжымына алғыс білдірді.
Конференцияда еліміздің ЖОО ғалымдары ғылыми-теориялық мәселелер көтеріп, жаңа идеялар мен ұтымды ұсыныстар айтты.
Жиын аясында «Ілияс Жансүгіров» монографиясы, «Ілиястану» оқулығы, «Өтірік өлеңдер» жинағы, Саят Ілиясұлының әкесі жайлы естеліктерінен құралған жинақ кітаптарының тұсауы кесілді.
Студент жастарға арналған «Ілияс әлемі» фестивалінде жыр мүшәйрасы, мәнерлеп оқу, сахналық қойылым бойынша сайыс өтті. Оған еліміздің жоғары оқу орындарынан және колледждерден 100-ге жуық студент қатысты.