RUS
SMARTNEWS.KZ басылымының хабарлауынша, Қазақстан құрамасының мүшесі, халықаралық жарыстардың жүлдегері Ермахан Жақпеков кәсіби мансабын аяқтағанын мәлімдеді. Бұл туралы боксшы өзінің Instagram парақшасында жазды.
— Бәрі де Алланың қалауымен. Қандай жағдай болса да — Әлхамдулиллаһ. Мен бокс мансабымды аяқтап жатырмын. Жарақат тоқтауға мәжбүр етті.
Бокс — өмірімнің үлкен бөлігі болды. Ол маған тәртіпті, мінезді, күш-жігер мен нағыз адамдарды сыйлады. Әр раунд, әрбір тер тамшысы, әрбір рингке шығу — мен үшін үлкен мақтаныш, — деп жазды Жақпеков.
Ол өзіне сенім артқан, жеңіс пен жеңіліс сәтінде жанынан табылған жанкүйерлер мен жақындарына алғыс білдірді.
— Бұл — соңы емес, жаңа бастама. Жекпе-жек енді рингтен тыс жерде жалғасады, — деп түйіндеді ол.
Ермахан Жақпеков — Қазақстанның бес дүркін, Азияның 2 дүркін чемпионы. Сондай-ақ 2018 жылы Будапештте (Венгрия) өткен жастар арасындағы әлем чемпионатының күміс жүлдегері.