RUS
SMARTNEWS.KZ басылымының хабарлауынша, Алматы облысы, Қозыбасы ауылында Lexus көлігінің жүргізушісі артқа шегінген кезде 6 жасар баланы қағып кетті. Оқиға бейнебақылау камерасына түсіп қалған. Бірақ жүргізуші зардап шеккен балаға көмектесудің орнына оқиға орнын тастап кеткен.
Полицияның мәліметінше, жол-көлік оқиғасы 4 шілде күні ауыл дүкендерінің бірінің маңында болған. Lexus RX 300 көлігі артқа жүріп бара жатып, велосипедпен ойнап жүрген 6 жасар баланы қағып кеткен.
Бейнежазбада жүргізушінің баланы қаққан соң, тоқтамай кетіп қалғаны анық байқалады. Бала ауыр жарақат алып, ауруханаға жатқызылған.
— Қазір күдіктінің жеке басын анықтау және оны ұстау бойынша жедел-іздестіру шаралары жүргізіліп жатыр. Облыстық полиция департаментінің жеке құрамы толық жұмылдырылды, — деп хабарлады Алматы облысы ПД.
Полиция өкілдері жол апаты фактісі және оқиға орнын тастап кету дерегі бойынша қылмыстық іс тіркелгенін, сотқа дейінгі тергеу амалдары басталғанын мәлімдеді.
Әлеуметтік желілерде тараған бейнежазба астындағы пікірлерде көлікті басқарған адам аудандық учаскелік полиция инспекторы болуы мүмкін деген болжам айтылған. Алайда Алматы облыстық ПД бұл ақпаратты растаған жоқ, тек азаматтарды ресми дереккөздерге ғана сенуге шақырды.