RUS
SMARTNEWS.KZ басылымының хабарлауынша, тележүргізуші, продюсер Ләйлә Сұлтанқызы балалық шағынан сыр шертті. Медиа маманы бала күнінде қой баққан кездерін есіне алды.
“Бала кезде күнде кешке көршілер бір-бірін аралап, түлігін іздейтін. Алты қойы, бір сиыры бұзауымен, Ақтөс атты итім бар еді. Кезегі келгенде қой бағып, ағасына шалап, бетіне шекер себілген нан мен май таситын қойшы Ләйлә мен боламын. Суретте еш уайымы жоқ, ерке, әкесінің қызы 7 жасар Ләйлә, оң жағымда туысқан ағам Асылбек, және 4 жасар туған інім Ерлан”, – деп жазды продюсер.
Сондай-ақ медиа өкілі 40 жыл бұрынғы фотоға түскен жеріне келіп, сол сәтті қайталады.
“Бұл – менің балалық шағым өткен жер. Бұрынғы Қайнардың маңындағы ауылым Қайтпас – 1. Бүгінгі Нұртас шағын ауданы. Араға 40 жыл салып осы суретті жалғыз қайталау бұйырыпты. Ағам – Бозарықта, інім Қаскелеңде отбасымен тұрады”, – деп жазды журналист.
Айта кетейік, "Маңдайын жырып, терезені сындырдым" деп Ләйлә Сұлтанқызы оқушы кезіндегі оқиғасын бөліскен еді.