RUS
SMARTNEWS.KZ басылымының хабарлауынша, Алматыда жолаушы кабина әйнегін сындырып, №120А автобусының жүргізушісіне шабуыл жасады. Аталған жайтты Astana TV арнасының жаңалықтар қызметі жеткізді.
Автобус жолаушысының оқыс әркеті видеоға түсіп қалып, әлеуметтік желіде тарады. Видеодан ашуға мінген ер адамның жүргізушімен сөз таластырып, ол отыратын кабинаның әйнегін сындырғанын көруге болады.
Екеуара жанжалға не себеп болғанын полиция қызметкерлері анықтап жатыр. Бұзақы ұсталып, қылмыстық іс қозғалды.
Полиция қызметкерлерінің айтуынша, бұзақының жеке басы бірден анықталды.
“Ол ұсталып, Қылмыстық-процестік кодекстің 128-бабына сәйкес уақытша ұстау изоляторына қамалды. Қазір істің объективті мән-жайын анықтау үшін жедел-іздестіру шаралары жүргізіліп жатыр. Өкінішке қарай, мұндай жағдайлар жиі болып тұрады”, – дейді Алматы полиция департаментінің ресми өкілі Салтанат Әзірбек.
Ол мұндай оқыс жағдайлар азаматтардың тәртібінің төмендігін, заң талабына бағынғысы келмейтіндігін көрсететінін айтады.