RUS
SMARTNEWS.KZ басылымының хабарлауынша, Қарағанды облысы Ақтоғай ауданы Шашубай ауылында жасөспірімдер арасында жантүршігерлік оқиға орын алды. 16 жастағы жасөспірім 14 жастағы Нұрсұлтанның үстіндегі киімін өртеп жіберген. Салдарынан Нұрсұлтан ауыр күйік жарақатын алған.
Жәбірленушінің анасының айтуынша, оқиға үй ауласында болған. Сол сәтте Нұрсұлтанмен бірге тағы үш жасөспірім болған. Олардың ішіндегі ең үлкені бензинді иіскеуді ұсынған, осы кезде жанармай Нұрсұлтанның шалбарына төгіліп кеткен. Кейін 16 жастағы жасөспірім бензин үшін өтемақы ретінде 4500 теңге сұраған. Алайда, Нұрсұлтан ақшасы жоғын айтқанда, оның үстіндегі киіміне өрт қойған.
Нұрсұлтан күйік шалған шалбарын шешуге тырысқанымен, жанармай сіңген мата терісіне жабысып қалған. Ең сорақысы, күдікті оқиға болған соң жедел жәрдем шақырмаған.
16 жасар баланың немқұрайлығына таңғалдым. Ол ұлыма жай ғана жаңа шалбар әкеліп беріп, болған оқиғаны ешкімге айтпауын талап еткен, – дейді Нұрсұлтанның анасы.
Қарағанды облысының полиция департаменті бұл оқиғаға қатысты қылмыстық іс қозғады. Күдіктінің аты-жөні анықталып, одан жауап алынды.
Күдіктінің жасына байланысты міндетті кешенді сот-психологиялық-психиатриялық сараптама тағайындалды. Сараптама қорытындысы шыққан соң іс сотқа жіберіледі. Тергеу Қарағанды облысының полиция департаменті басшылығының бақылауында, – делінген ресми хабарламада.
Ауыр күйік алған Нұрсұлтан Балқаш қаласындағы ауруханаға жеткізілді. Дәрігерлер оған орта дәрежедегі күйік диагнозын қойды.
Сонымен қатар, Нұрсұлтанның анасы ұлының мектепте де қатарластары тарапынан қысым көріп жүргенін айтты. Дегенмен, ол бұл істің жабылып қала ма деп алаңдайтынын жеткізді.