RUS
SMARTNEWS.KZ басылымының хабарлауынша, Астанада полицей көпірден секірген ер адамды құтқарып қалды.
Polisia.kz мәліметінше, бүгін таңғы сағат 06:35 шамасында кезекшілік кезінде полицейлер «Арқар» көпірінің қоршауынан асып өткен ер адамды байқаған. Олар дереу оқиға орнына жеткенімен, азамат сол сәтте суға секіріп кеткен еді.
Оқиға орнына патрульдік полиция полкінің қызметкерлері Нұрсұлтан Динабеков пен Думан Тойғұлынов жедел жетті. Жағдайды бағамдаған полиция капитаны Нұрсұлтан Динабеков бірден суға түсіп, зардап шеккен азаматқа қарай жүзіп барды. Ол ер адамға құтқару шеңберін кигізіп, оны жағаға алып шықты. Онда жедел жәрдем тобы дайын тұрған еді.
Ойлануға уақыт болмады. Мен жақсы жүземін, сондықтан өзімді сенімді ұстадым. Жылдам әрекет ету керек болды. Бұл - менің полиция қызметкері әрі адам ретіндегі парызым. Мұндай сәтте тек бір ғана мақсат болады - адамды құтқару, - деді Нұрсұлтан Динабеков.
Зардап шеккен азаматқа қажетті медициналық көмек көрсету үшін ол жедел жәрдем қызметкерлеріне тапсырылды. Оқиғаның мән-жайы анықталып жатыр.