RUS
SMARTNEWS.KZ басылымының хабарлауынша, Ақтөбеде суға кеткен тұрғын туыстарына хабар берілместен, бауырластар зиратына жерленген. Ер адамды баспанасыз ретінде тіркеп, белгісіз адам ретінде жер қойнына тапсырған.
Сот материалдарына сүйенсек, 2024 жылғы 16 маусымда шағымданушылардың бауыры Қарғалы өзенінде суға батып кеткен. Полиция өкілдері тергеу бастады, мәйітті мәйітханаға жөнелтті. Алайда марқұмның жақындарына бұл туралы еш хабар берілмеген.
6 қыркүйекте марқұм белгісіз адам ретінде бауырластар зиратына жерленген. Ал бұл уақытта оның туыстары іздеу жариялап жүрген. Тек 9 қыркүйекте ғана олардың ағасының қайтыс болғанын естігені белгілі болды.
Жанұя мүшелері моральдық шығын ретінде әр мекемеден 2 миллион теңгеден өндіруді талап етіп, Қаржы министрлігі мен облыстық полиция департаментін сотқа берген.
Сотта анықталғандай, полиция қызметкерлері марқұмның туыстары қайда тұратынын білгенімен, ешқандай әрекет жасамаған. Осы әрекетсіздігі үшін олар қызметінен босатылып, тәртіптік жауапкершілікке тартылған.
«Сот талапкерлердің жақын туысының өліміне байланысты моральдық зиян шеккенін және оны жерлеу мүмкіндігінен айырылғанын орынды деп таныды», – деп мәлімдеді Ақтөбе соты.
Сот шешімімен полиция департаменті әр талапкерге 300 мың теңгеден өтемақы төлеуге міндеттелді. Алайда шешім әлі заңды күшіне енген жоқ.