SMARTNEWS.KZ басылымының хабарлауынша, Маңғыстау облысы Түпқараған ауданында жеке жүргізушіге шабуыл жасап, Hyundai Accent көлігін айдап кеткен екі күдікті ұсталды. Бұл туралы облыстық полиция департаменті хабарлады.
Оқиға 30 маусым күні кешкі сағат 20:30 шамасында Ақшұқыр ауылы маңында болған. Күдіктілер жүргізушінің қызметіне жолаушы ретінде тапсырыс беріп, жол үстінде шабуыл жасаған.
«Белбеумен мойнын қысып, күш қолдану арқылы ер адамды көліктен шығарып, автокөлікті айдап кеткен», – делінген полиция мәлімдемесінде.
Жедел-іздестіру шаралары нәтижесінде күдіктілер дереу анықталып, уақытша ұстау изоляторына қамалды. Қазір аталған дерек бойынша қылмыстық іс қозғалып, тергеу жүргізіліп жатыр.