RUS
SMARTNEWS.KZ басылымының хабарлауынша, Қазақстанда қоғамдық орындарда бетті тұтастай жабатын киімдерге, соның ішінде никабқа тыйым салынды. Осыған байланысты Қазақстан мұсылмандары діни басқармасы (ҚМДБ) ресми мәлімдеме жасап, жаңа заңның мәнін түсіндірді.
Муфтияттың хабарлауынша, бұл шешім қандай да бір діни сенімді шектеуге емес, ең алдымен қоғамдық қауіпсіздікті қамтамасыз етуге бағытталған.
«Бұл заң ешкімнің діни еркіндігі мен таңдауына шектеу қою мақсатында қабылданған жоқ. Бүгінгі таңда әлемнің көптеген елдері, соның ішінде бірқатар мұсылман мемлекеттері де, қауіпсіздік мақсатында осындай шаралар қабылдап отыр», – делінген ҚМДБ мәлімдемесінде.
Діни басқарма өз ұстанымын Құран мен Пайғамбар хадистері негізінде түсіндірді. Атап айтқанда, «Ан-Нур» сүресінің 31-аятында мұсылман әйелдерге тән ұяттылық нормалары баяндалған:
«Мүмін әйелдерге айт: көздерін төмен салсын, ар-намыстарын сақтасын. Көрсетілетін нәрседен басқа әшекейлерін көрсетпесін...» – делінген аятта. Діни басқарма бұл аятты «бет пен қолдың ашық болуы – Құранға қайшы емес» деген қорытындымен түсіндіріп отыр.
Сонымен қатар, Имам Абу Дауд жеткізген хадисте Пайғамбар Мұхаммед (с.ғ.с.) өзінің қызына:
«Уа, Асма! Қыз бала балиғатқа жеткен кезде оның денесінің мына және мына жерлерінен басқа ештеңесі көрінбеуі тиіс», – деп, бет пен қолын көрсеткені айтылған.
Муфтият: Никаб – дәстүрімізге жат, Ислам қоғаммен үндестікті дәріптейді
Мәлімдемеде толықтай бет жабу тәжірибесі қазақ халқының дәстүріне тән емес екені де айтылды. Діни басқарма қоғамдағы тұрақтылық пен бірлікті сақтаудың маңызын атап өтті:
«Біз – Қазақстан мұсылмандарының біртұтас діни ұйымы ретінде қоғамдық тұрақтылық, келісім және бірлік – басты құндылықтарымыздың бірі деп санаймыз. Ислам діні де қоғаммен үйлесімді өмір сүруге, тәртіп сақтауға және елдің тыныштығына үлес қосуға шақырады. Сондықтан жаңа заңға түсіністікпен қарап, қоғам игілігі үшін бірлігімізді күшейтейік», – делінген ҚМДБ мәлімдемесінде.
Еске салсақ, 30 маусымда Қазақстан Президенті құқық қорғау қызметін жетілдіруге бағытталған заңға қол қойды. Заң бойынша, қоғамдық орында бетті тұтастай жабатын киім киюге тыйым салынады. Бұл шектеу никабқа да қатысты.