RUS
SMARTNEWS.KZ басылымының хабарлауынша, жас әнші Ильхан Ихсан AIQAP подкастына берген сұхбатында қазақстандық музыка индустриясының дамуы мен жаңа буын орындаушыларының қалыптасуы туралы ойын айтты. Оның айтуынша, бүгінде тыңдарман жүрегіне жол тапқан көптеген жас орындаушылардың жолын ашқан — Ninety One тобы.
«Ninety One болмаса, біз де болмас едік. Біз — мен, Sadraddin, Kalifarniya, Мирас және тағы басқалар. Қазақ тілінде әлемдік деңгейдегі музыканы жасауға болатынын дәлелдеген алғашқы топ — осы жігіттер. Бұған дейін бізде ондай масштабтағы бейнебаян да, рэп пен попты сәтті үйлестірген әндер де болмаған», — дейді Ильхан.
Ильхан подкастта Қайрат Нұртасқа ән жазып бергенін де алғаш рет жария етті. Ол танымал болған «Сен менің адамымсың» әнінің авторы екенін айтты. Ән Құралай Анарбекованың фильміне жазылған саундтрек ретінде ұсынылған. Ән үшін қаламақы ретінде Ильхан 3 миллион теңгеге АҚШ-тан арнайы ноутбук алдырғанын жеткізді. Қайрат Нұртаспен ән шыққаннан кейін тек бір рет видеоқоңырау арқылы сөйлескенін, бірақ содан кейін байланыс үзілгенін айтты.
«Қайрат ағамыз “Әнің хит болды, тағы жазайық” деді. Бірақ сол күйі хабар болмады. Концертіне барғым келіп, өзім де жаздым, жауап болмады. Айтуларынша, оның уақыты алдын ала бір жыл бұрын жоспарланады екен», — дейді ол.