RUS
SMARTNEWS.KZ басылымының хабарлауынша, продюсер Баян Алагөзова (Мақсатқызы) Астанадағы әуежайда әйелге балағат сөздер айтқаны үшін сынға ұшыраған әнші Жұбаныш Жексенұлына қолдау білдірді. Бұл туралы ол Instagram парақшасында жариялаған видеоүндеуде айтты.
Продюсердің айтуынша, Жұбаныштың әрекетінен бұрын, оны рұқсатсыз видеоға түсірген адам жауапқа тартылуы тиіс еді.
«Мен барлық әртістер мен танымал адамдардың атынан айтқым келеді. Адамдар қоғамдық орында біреудің жеке кеңістігін бұзып, оны рұқсатсыз түсіруге құқығы жоқ екенін түсінбейді. Өйткені ол да сіз бен біз секілді адам», – деді Алагөзова.
Ол гастрольмен жүретін өнер адамдарын түсіну керектігін, ұйқысыз түндер мен ұзақ жолдардан кейін әртістің көңіл күйі болмауы қалыпты жағдай екенін алға тартты.
«Мысалы, адам жай ғана отырып тамақ ішіп жатса, балаларымен сөйлесіп отырса немесе көңіл күйі болмаса, оған камераны тақап түсіру дұрыс емес. Жұбаныш та мүмкін шаршаған шығар. Мұндай реакция кез келген адамда болуы мүмкін. Бірақ ол әртіс болған соң, бәрі дүрлігеді. Ал негізі әртіс әрдайым суретке түсуге міндетті емес», – деді ол.
Баян Мақсатқызы сонымен қатар желі қолданушыларының реакциясына да шүйлікті.
«Біз Жұбаныштың басынан не өткенін нақты білмейміз. Бірақ біреу келіп, камерасын қосып, селфи жасайық десе, адам ашулануы мүмкін. Қазір біреудің басына қиындық түссе, көпшілік соған мәз болып, жамандай жөнеледі. Бұл – қоғамда қалыптасқан жаман әдет», – деп түйіндеді ол.
Баян Алагөзова екі тарап та жағдайға түсіністікпен қарап, жауапкершілік танытуы қажет екенін айтты.