Teach for Qazaqstan жаңа оқу жылында үш өңірде жұмысын бастайды
Қазақстанда 1 қыркүйек – тек Білім күні ғана емес, білім саласындағы тең мүмкіндіктер мәселесіне назар аудартатын күн.
SMARTNEWS.KZ басылымының хабарлауынша, биыл Teach for Qazaqstan бағдарламасы ауқымын кеңейтіп, Ақтөбе (Хромтау), Қостанай (Рудный) және Павлодар (Ақсу) облыстарындағы моноқалалардың мектептерінде жұмысын бастайды. Бұл туралы ұйымның баспасөз қызметі хабарлады.
Бағдарламаның мақсаты – жас көшбасшылар мен түрлі саланың кәсіби мамандарын мектептерге тарту. Олардың миссиясы тек математика, физика немесе әдебиеттен сабақ беру емес. Олар – оқушыларға үлгі, көшбасшылыққа жетелейтін ментор, өз күшіне сенуге үйрететін тұлға. Teach for Qazaqstan қатысушылары мұғалім тапшылығы сезілетін ауыл мектептерінде және шағын қалаларда еңбек етеді. Көптеген балалар үшін мұндай ұстазбен кездесу өмірін өзгерткен сәтке айналады: олар өз қоғамын дамытуға үлес қосып жүрген адамды көреді.
Биыл бағдарлама ауқымын кеңейтіп отыр. ERG Mektep серіктестігі аясында Teach for Qazaqstan мұғалімдері Ақтөбе, Қостанай және Павлодар облыстарындағы мектептерде қызметін бастайды. Бұл индустриялық аймақтардағы жүздеген оқушыға заманауи білім мен көшбасшылық мәдениетін игеру мүмкіндігін береді.
Сонымен қатар, Қарағанды облысында екі жылдық Fellowship бағдарламасы жалғасуда. Оның негізгі серіктесі – Freedom Holding Corp. Компанияның қолдауымен жаңа қатысушыларды тарту, оқыту сапасын арттыру және білім теңсіздігін жоюға бағытталған ұзақ мерзімді шешімдер жүзеге асуда.
Teach for Qazaqstan – бұл жай ғана білім беру жобасы емес. Бұл – еліміздің кез келген нүктесіндегі әр бала сапалы білім алуға лайық деген сенім. Бағдарлама мемлекет, бизнес және қоғам күшін біріктіріп, нағыз серіктестік пен ортақ мақсат бар жерде өзгеріс мүмкін екенін дәлелдеп келеді.
Материал авторы
