RUS
SMARTNEWS.KZ басылымының хабарлауынша, Алматы халықаралық әуежайында 2 қыркүйек күні ерекше оқиға тіркелді. Халықаралық рейске тіркеу кезінде көршілес елдің 18 жастағы азаматы багажында «атом бомбасы бар» деп қалжыңдаған.
Әзілдің соңы оның өзіне ауыр тиді. Жолаушы қоғамдық тәртіпті бұзып, азаматтардың тыныштығына қауіп төндіргені үшін «ұсақ бұзақылық» бабы бойынша әкімшілік жауапкершілікке тартылды.
Көліктегі полиция департаменті мұндай жағдайлардың салдары ойлағаннан да ауыр болатынын атап өтті.
«Кейбір азаматтар орынсыз қалжыңның қаншалықты қауіпті екенін түсіне бермейді. Әуе және теміржол көлігінде кез келген қорқыту әрекеті қауіпсіздікке тікелей қатер төндіреді», – деді ведомство өкілдері.
Жыл басынан бері қоғамдық тәртіпті бұзғаны үшін пойыздар мен ұшақтардан барлығы 900 жолаушы түсірілген. Оның ішінде 489-ы – жолаушылар пойызынан, ал 411-і – әуе кемелерінен. Ең жиі кездесетін заңбұзушылықтарға алкогольдік ішімдік ішу, мас күйде жүру, ұсақ бұзақылық және көлік ішінде темекі шегу жатады.
Құзырлы орган көлік құралдарындағы кез келген тәртіпсіздік заңға сәйкес қатаң жазаланатынын ескертті.