RUS
SMARTNEWS.KZ басылымының хабарлауынша, «Қазгидромет» 9–10 қазан күндері еліміздің бірнеше облысында ауа райының күрт өзгеретіні туралы ескерту жариялады.
Алматы облысында түнде 3 градусқа дейін үсік жүреді. Облыстың солтүстігінде төтенше өрт қаупі сақталады.
Жетісу облысында 8–9 қазанда түнгі уақытта 1–6 градус үсік күтіледі, ал Талдықорғанда ауа температурасы 3–5 градусқа дейін төмендейді.
Жамбыл облысының батысында, солтүстігінде және таулы аудандарында да үсік пен тұман болжануда. Кей жерлерде желдің екпіні 20 м/с-қа дейін күшейеді.
Түркістан мен Қызылорда облыстарында 9 қазанда шаңды дауыл тұрып, солтүстік-шығыстан соққан желдің екпіні 15–20 м/с дейін жетеді.
Батыс Қазақстан мен Атырау облыстарында да жел күшейіп, төтенше өрт қаупі сақталады. Ал Маңғыстау өңірінде шаңды дауыл мен қатты жел күтіледі.
Сондай-ақ Қарағанды, Қостанай, Ақмола және Солтүстік Қазақстан облыстарында тұман түсіп, көріну қашықтығы шектеледі.
Шығыс Қазақстан облысының Өскемен қаласында 8–9 қазан аралығында екінші дәрежелі қолайсыз метеожағдайлар сақталатыны ескертілді.