RUS
SMARTNEWS.KZ басылымының хабарлауынша, 28 қазан күнгі IQAir халықаралық рейтингі бойынша Алматы төртінші орында тұр. Қазақстанның ең ірі мегаполисіндегі ауа сапасының индексі (AQI) – 174, бұл көрсеткіш денсаулыққа зиянды деңгей саналады, әсіресе балалар мен қарттарға қауіпті.
Рейтингтің алғашқы үштігінде — Лахор, Пекин және Дели. Алматымен қатар алғашқы ондыққа Дакка, Ташкент, Карачи, Дубай, Батам және Улан-Батор кірген.
Эколог Равкат Мухтаровтың айтуынша, қазір қалада ауа айналымы тоқтап, штиль орнаған. Әлсіз солтүстік және солтүстік-шығыс желі ТЭЦ-3 пен жеке сектордағы көмір отынынан шыққан түтінді тауға қарай айдап, төмен қабаттарда қалың смогтың жиналуына себеп болған.
Сарапшылар бұған дейін Алматыдағы ластанудың негізгі көзі — көлік екенін, қаладағы 1 миллионнан астам автокөліктің 60%-ы ауаға зиянды газ шығаратынын мәлімдеген. Оның үстіне, экопосттар да толық жұмыс істемей отыр: күн сайын мыңдаған көлік кірсе де, небәрі бірнеше жүргізуші ғана айыппұл алады.
IQAir деректері бойынша әлемдегі ең лас 30 қаланың 29-ы — Азияда. Тізімде Азиядан тыс тек бір қала бар — Перу астанасы Лима.