RUS
SMARTNEWS.KZ басылымының хабарлауынша, ресейлік әнші Акмальдің даулы сөзі мен Полина Гагаринаның гастролі тоқтатылғаннан кейін, қоғам назары енді Тиматиге ауысты.
Бұған дейін Петропавлда өткен концертінде Акмаль «Пакетик этот сожгите, цвета мне не нравятся» деп, сары-көк түсті пакетті жақтырмайтынын айтқан болатын. Бұл түс — Қазақстан туының реңктерімен сәйкес келетіндіктен, оның сөзі әлеуметтік желіде үлкен резонанс туғызды. Кейіннен елдегі барлық концерті жойылды.
Полина Гагаринаның да 27 қарашаға жоспарланған Астанадағы концерті болмайтын болды. Себебі әнші Ресейдің саясатын ашық қолдайтыны үшін сынға ұшырады.
Енді қазақстандықтар Тиматидің елге келуіне қарсы шығып отыр. Рэпер қараша айында екі концерт өткізуді жоспарлаған:
— 27 қараша — Алматы (Almaty Arena),
— 28 қараша — Астана.
Тимати бұған дейін қазақстандық тыңдармандарына бейнеүндеу жолдап, былай деген:
«Ассаламу алейкум, Қазақстан! Жеті жыл бойы сіздерде болмадым, бірақ қарашада бұны түзейміз. Концерт шынымен мықты болады. Көріскенше!»
Алайда желі қолданушылары мен белсенділер мұнымен келіспей, Тиматидің концерттерін болдырмауды талап еткен петиция жариялаған. Мәтінде былай делінген:
«Біз, Қазақстан азаматтары, оның елге келуіне қарсымыз. Қазақстан Украина аумағының тұтастығын қолдайды әрі әскери қақтығыстарда бейтарап ұстанымда».
Белсенділер рэпердің Ресейдің соғыс саясатын қолдайтын мәлімдемелерін мысалға келтіріп, мұндай әртістердің елімізде сахнаға шығуы дұрыс емес деп санайды.
Алайда бұл петиция модерациядан өтпеген.