RUS
«Мемлекет басшысы елімізде инклюзивті қоғам құруға көп көңіл бөледі. Қазірдің өзінде белгілі бір нәтижелер бар. Бүгін менің Мәжілісте сөйлеп тұрғаным да – жүргізіліп жатқан реформалар жетістіктерінің бірі. Алайда, инклюзивті қоғам бір күнде құрылмайды. Инклюзия біздің өміріміздің барлық салаларына енуі үшін оған тек үкімет қана емес, сонымен бірге қоғамдық қатынастардың барлық субъектілері де қатысуы керек. Оның ішінде жеке бизнес те бар.
Бүгінгі күні мүгедектігі бар адамдарды әуе көлігімен тасымалдауда қолжетімсіздік мәселесі кездеседі. Ұшаққа билет сатып алу мүмкін емес, жеңілдіктер және одан да бөлек тегін ұшу мүмкіндігі қарастырылмаған. Билет құны көбінесе бір айлық әлеуметтік төлем көлемінен асып кетеді», - деді Ерлан Әбдиев Мәжілістің жалпы отырысында Премьер-Министрдің бірінші орынбасары Роман Склярға сауал жолдай отырып.
Сондай-ақ, ол мүгедектігі бар жолаушылардың ұшу ақысына жеңілдік берілетін халықаралық тәжірибенің барын алға тартты.
«Шетелдік компания біздің нарыққа осындай жеңілдіктер пакетімен кірді. Бірақ, көп ұзамай ол басқа тасымалдаушыларға назар аудара отырып, саясатын өзгертіп жіберді.
Бүгінгі таңда елімізде І және ІІ топтағы мүгедектігі бар адамдардың саны – шамамен 340 мың және 80 мыңға жуық баланың мүгедектігі бар. Мемлекет субсидиялайтын біздің авиакомпанияларымыздың, инклюзивті қоғам құруға өз үлесін қосуға мүмкіндігі жоқ болғаны ма? Мәселе мүмкіндікте емес, мәселе үлес қосамын деген ниетте екеніне сенімдімін», - дейді ол.
Осылайша, Ерлан Әбдиев мүгедектігі бар жандардың өмір сүру сапасын жақсарту мен мобильділігін арттыру мақсатында ішкі әуе рейстеріне жеңілдіктер қарастыруды ұсынды:
- І және ІІ топтағы мүгедектігі бар адамдар үшін жеңілдіктер немесе арнайы тариф билет құнының 50% мөлшерінде болсын;
- Осы санаттағы адамдарға жылына бір рет, бір бағытқа ұшып бару және ұшып қайту тегін әуе қатынасымен қамтамасыз етілсін;
- Мүгедектігі бар балаларға әрқашан тегін рейстер жасалсын;
- Ұшу барысында сүйемелдеуді қажет еткен жағдайда, сүйемелдеуші адамдар үшін жеңілдетілген тариф көзделсін.