RUS
SMARTNEWS.KZ басылымының хабарлауынша, Абай облысында күйеуін қорғап, адам өліміне себеп болған әйелдің ісі қайта қаралып, үкім өзгертілді. Кассациялық сот шешімімен ол сот залынан босатылды.
Оқиға 2024 жылдың шілдесінде болған. Тергеу деректеріне сәйкес, әйел күйеуіне жасалған қатыгез шабуылдың куәсі болған. Шабуыл жасаған адам ер адамның мойнын аяғымен басып, тұншықтырған. Сол сәтте әйел ағаш кесегін алып, бір рет соққы жасаған. Бұл соққы шабуылдаушы үшін өлімге әкелген.
Бұған дейін аудандық сот әйелді Қылмыстық кодекстің 106-бабының 3-бөлігі бойынша кінәлі деп танып, 6 жылға бас бостандығынан айырған. Сонымен қатар одан 3 млн теңге моральдық өтемақы өндірілген. Облыстық сот бұл үкімді өзгеріссіз қалдырған.
Кассациялық шағымда қорғау тарапы оқиғаның күйеуін қорғау барысында болғанын алға тартып, әрекетті жеңіл бапқа ауыстыруды сұраған. Кассациялық сот бұл уәжбен ішінара келісті.
Сот әйелдің шынымен де күйеуін қорғау мақсатында әрекет еткенін мойындады. Алайда ауыр затпен басқа соққы жасау арқылы қажетті қорғаныс шегінен асып кеткен деген қорытындыға келді. Сонымен қатар сот оның өкініш білдіруін, кәмелетке толмаған баласының барын, үшінші топ мүгедектігін және оқиғаға марқұмның өз әрекеті себеп болғанын ескерді.
Нәтижесінде іс «қажетті қорғаныс шегінен шығу» бабы бойынша қайта сараланып, жаза мерзімі бір жылға дейін қысқартылды.
Іс қаралған сәтте бұл мерзім толық өтеліп қойғандықтан, әйел сот залында бірден босатылды.