RUS
Smart қаланы қалыптастырудағы басты мақсат - экономикалық, экологиялық, әлеуметтік және мәдени аспектілердегі қажетті ресурстарды қамтамасыз ету арқылы қалалардағы өмір сүру сапасын, қызметтердің тиімділігін, сондай-ақ бәсекеге қабілеттілігін арттыру үшін ақпараттық-коммуникациялық технологияларды және басқа да құралдарды пайдалана отырып инновациялық қала жасап шығару.
Сондықтан Цифрлық даму, инновациялар және аэроғарыш өнеркәсібі министрлігі, Smart қаланы құру 9 сала шеңберінде іске асуы керек деп көрсеткен.
Олар:
- білім саласы
- көлік және жол инфрақұрылымы
- денсаулық сақтау
- қауіпсіздік
- туризм, мәдениет және спорт
- экология
- тұрғын үй-коммуналдық шаруашылық
- қаланы басқару
- IT-әлеует.
Бұл салаларға қарасты бірнеше тиімді жобалар қарастырылған. Сол цифрлық бастамалардың тиімділігін бағалау облыс орталықтарында, республикалық маңызы бар қалаларда және Астанада мониторинг жүргізуге арналған.
Еске сала кетсек, қаңтар айында Мемлекет басшысы Қасым-Жомарт Тоқаевтың төрағалығымен елорданы дамыту мәселелері жөніндегі кеңес отырысында бірқатар іске асуы керек жобалар төңірегінде мынадай мәлімдеме жасаған еді:
«Біз Астананы жасампаз, жайлы және таза қала қағидасына сәйкес дамытуымыз керек. Әлемдегі барлық озық тәжірибені тиімді пайдалануымыз керек.
Жалпы, Астананың қазіргі ауыр жағдайын тез арада өзгерту маңызды. Елорданы жаңғырту қажет. Осы мақсатпен қаланың даму стратегиясын қайта қараған жөн. Құжатта қаланы кешенді түрде дамытудың негізгі бағыт-бағдары айқын көрсетілуге тиіс. Әкімдікке арнайы қоғамдық тыңдау өткізіп, қаланың жаңа Бас жоспарын әзірлеуді тапсырамын. Сосын Үкімет оны жыл соңына дейін мақұлдауы керек. Президент Әкімшілігі жұмыстың уақтылы әрі сапалы орындалуын бақылауға алады. Сіздерден нақты нәтиже күтемін», - деп міндеттеген болатын.
Осылайша, ҚР «ақылды» қалаларының эталондық стандарты қазірде Ашық НҚА порталында ашық қоғамдық талқылауға қолжетімді күйде.
Талқылау 26 маусым күні аяқталады.