RUS
Аталған қабір Әл-Фараби атындағы Қазақ ұлттық университетінің археологиялық экспедициясы тарих ғылымының докторы, қауымдастырылған профессор Досбол Байғонақовтың жетекшілігімен табылған.
Далалық жұмыстар барысында ауылдың оңтүстік шетіндегі Кіші Алматы өзені жағалауындағы қорған зерттелген. Қорғанның орталық бөлігінен 1,2 м тереңдіктен бір деңгейде жатқан, бірақ жерлеу рәсімінде айырмашылықтары бар екі қабір аршылған.
Бірінші жерлеу орны батыстан шығысқа қарай бағытталып, ұсақ тастардың үстінде жатыр. Жерленген адамның бас жағына жануарлардың сүйектері, сондай-ақ құмыралар, аласа шыныаяқтар мен тостағандар түріндегі қыш ыдыстар қойылған. Сонымен қатар жерлеу орнынан қола айна мен алтын фольгаға оралған моншақ табылған.
Өкініштісі, жерлеу шұңқырының шығыс бөлігі тоналған. Себебі қаңқа сүйектерінің көпшілігі жоқ. Әрі біртұтас әшекей бұйымды құраған алтын моншақтардың көп бөлігі қолды болған.
Екінші жерлеу орны біріншісінен оңтүстікке қарай 1,5 м жерде орналасқан. Ол жерде тас төсендісі жоқ, оңтүстік-батыстан солтүстік-шығысқа бағытталып жатқызылған. Жерлеу орнынан алты керамикалық ыдыс пен үстіне пышақ қойылған малдың сүйектері анықталған. Сондай-ақ бас сүйегінің сол жағынан қола айна табылған. Бас сүйектің үстінен әшекей болуы мүмкін алтын фольга қалдықтары аршылды. Бағалы тастармен көмкерілген алтын сырға, алтын моншақ бөлігі табылған. Ал оң қол саусақтарының тұсынан сақтарға тән акинак (қанжар) табылып отыр.
Жерлеу рәсіміне қарағанда, бұл қабірлер әртүрлі уақыт аралығында салынған.
Экспедиция жетекшісінің пікірінше, қорған үйіндісінің астында тағы да жерлеу орындары болуы мүмкін. Келешекте қорған толығымен зерттелмек. Қазіргі уақытта табылған барлық олжа далалық зертхана жағдайында зерттеліп жатыр.